Në dimër dhe pranverë, liqeni i ndodhur në veriperëndim të Osoyoos, në Luginën e Okanagan në British Columbia, duket si çdo tip tjetër uji.
Por sapo pjesa më e madhe e ujit avullon gjatë verës, qindra pishina të kripura mbeten pas, duke krijuar një peizazh me pika me ngjyrë të verdhë, jeshile dhe blu. Ky vend i quajtur me të drejtë Liqeni me Pika (Spotted Lake), konsiderohet si një nga vendet më speciale në Kanada.
Ky fenomen shpjegohet nga një shkencë e thjeshtë: formimi i pishinave plot ngjyra është rezultat i një përqendrimi të lartë mineralesh, duke përfshirë sulfatet e kalciumit, natriumit dhe magnezit, të cilat janë mbledhur në ujë nga kodrat përreth. Ngjyrat e ndryshme varen nga sasia e këtyre mineraleve në çdo pishinë.
Mundesh me e lexu edhe...
Liqeni, i njohur fillimisht nga Kombi i Parë i Luginës së Okanagan si Kliluk, ka qenë një vend i shenjtë për shekuj me radhë. Populli indigjen besonte se secili prej qarqeve kishte veti shëruese dhe medicinale të ndryshme.
Ironikisht, këto minerale u shfrytëzuan edhe për qëllime industriale. Gjatë Luftës së Parë Botërore, mineralet nga liqeni u përdorën për të prodhuar municione. Punëtorët nxirrnin rreth një ton kripë nga liqeni çdo ditë. Thuhet se para kësaj periudhe, liqeni shfaqte “një shumëllojshmëri edhe më të madhe ngjyrash dhe një bukuri edhe më të madhe artistike”.
Për shumë vite, toka përreth ujit ishte në pronësi private, por në vitin 2001, ajo u ble për t’i kthyer përfitimin dhe përdorimin Kombit Okanagan. Ky veprim siguroi që toka të mbrohej nga zhvillimi dhe të restaurohej si një vend kulturor dhe mjedisor me rëndësi.
Për të mbrojtur zonën, një gardh është ngritur rreth liqenit me një shenjë që shpjegon ndjeshmërinë kulturore dhe ekologjike të tij. Vizitorët nuk mund t’i afrohen shumë, por ka shumë pika të mira vëzhgimi përgjatë autostradës për të parë pikat e famshme të liqenit. /AP/Katror.info
