Javën që shënon lirinë e mediave, Asociacioni i Gazetarëve të Kosovës bashkë me Ambasadën e Holandës, e ka nisur me një ekspozitë, ku janë paraqitur karikaturat nga artistë të gjashtë vendeve të Ballkanit Perëndimor.
Përmes karikaturave, u bë thirrje që të ruhet liria e mediave si një nga komponentët vitale të një demokracie funksionale. E ndërsa, Kosova nuk përjashtohet nga vendet ku liria e mediave kërcënohet, gazetarëve u është përçuar mesazhi që të qëndrojnë të guximshëm në raportimin e tyre të drejtë dhe në mbajtjen përgjegjës të qeverisë.
“Gazetarët janë zëri i lirisë së medias dhe liria e gazetarëve hyn te të drejtat e njeriut. Është e rëndësishme që gazetarët të kenë mundësinë të ushtrojnë të drejtën e tyre dhe të bëjnë punën e tyre në mënyrë të pavarur sa më shumë që të jetë e mundur, sepse kjo është e rëndësishme për një demokraci vibrante, në mënyrë që të gjithë ta kenë parasysh atë që gazetarët informojnë publikun dhe se ata luajnë një rol jetik,” thotë ambasadorja e Holandës në Kosovë, Carin Lobbezoo.
Mundesh me e lexu edhe...
Raportimi i besueshëm dhe gazetaria hulumtuese formojnë bazat për një debat të shëndoshë publik. Në këtë rast, edhe karikaturistët që përdorin lapsin për të mbajtur përgjegjës institucionet, që shpërfaqin padrejtësitë apo abuzimin me pushtetin, nuk do të mund ta bënin punën e tyre pa liri të mediave.
Kryetari i Bordit të Asociacionit të Gazetarëve të Kosovës, Xhemajl Rexha, thotë se tri vitet sa udhëheq këtë bord, nuk kanë qenë të lehta.
“Në këto 3 vjet ka pasur sulme të orkestruar atë qeverisë Kurti ndaj mediave me qëllimin e vetëm që ta bëjë opinionin publik të mos iu besojë mediave, pavarësisht se çka ato raportojnë, pavarësisht nëse ato me fakte, argumente e dokumente vërtetojnë për vendime të diskutueshme e në rastet me të këqija edhe joligjore. Vështirësitë kanë kulmuar në maj dhe qershor ne veri të vitit të kaluar, dhe sulme të rënda fizike ndaj gazetarëve në veri të Kosovës. Kosova e ka treguar veten gjatë gjithë pasluftës që është një demokarci e re, por e ka shumë të rëndësishme në kushtetutën e saj, respektimin e lirisë së shprehjes mbi të gjitha dhe natyrisht aty edhe lirinë e medias,” tha Rexha.
Ndërsa, kërkohet që të ketë liri të mediave, në të njëjtën kohë mediave u kërkohet që të respektojnë kodet etike.
Ambasadorja e Holandës në Kosovë mendon se është përgjegjësi e institucioneve që të sigurojnë këtë liri të mediave.
“Është e rëndësishme që qeveria të sigurohet që të drejtat e njeriut janë të garantuara dhe aty ku ka problem me lirinë e shtypit, ta dëgjojnë shpesh AGK-në, e cila ua sjell këtë në vëmendjen e tyre teksa përpiqen ta përmirësojnë situatën. Kjo është arsyeja pse ne mbështesim lirinë e mediave në mbarë botën.”
Ndryshe, për të gjithë ata që duan ta shohin se si shihet liria e mediave në vendet e Ballkanit Perëndimor nga karikaturistët, ekspozitën mund ta vizitojnë në Lapidariumin e Muzeut Kombëtar deri më 3 maj.
Kjo ekspozitë është rezultat i konkursit për karikatura të Ballkanit Perëndimor për Lirinë e Medias. Nga gjithsej 186 aplikime të 95 artistëve nga Shqipëria, Kosova, Bosnje dhe Hercegovina, Mali i Zi, Maqedonia e Veriut dhe Serbia, një juri ekspertësh nga të gjitha këto shtete, përzgjodhi 44 karikatura.
Vendin e parë e zuri karikaturisti nga Serbia, Dusan Petricic, teksa vendin e dytë, karikaturisti nga Maqedonia e Veriut, Armend Ajredini. /Katror.info
Përgatiti:
