Pas pesë ditësh emocionuese garash, Lituania është shpallur kampione e Evropës në Esports, duke triumfuar në disiplinën “Counter Strike 2”, ku në finalen e madhe mposhti përfaqësuesen e Ukrainës. Vendi i tretë iu takua Gjermanisë. Ndërkohë, në kategorinë “Dota 2”, trofeun e ngriti Maqedonia e Veriut, pasi mposhti Bjellorusinë në një përballje të fortë finale, shkruan Katror.info.
Kampionati Evropian i Esports, i zhvilluar nga 9 deri më 13 korrik në sallën “1 Tetori” në Prishtinë, mblodhi 24 shtete pjesëmarrëse dhe qindra tifozë, profesionistë e entuziastë të lojërave elektronike. Kosova, megjithëse u ndal në çerekfinale pasi u mposht nga kampionia Lituani, dëshmoi një nivel të lartë organizimi, duke u vlerësuar nga të gjithë si një mikpritëse e shkëlqyer.
Ngjarja u karakterizua nga infrastrukturë moderne, kushte optimale për garuesit, përfshirje të gjerë të mediave dhe bashkëpunim të ngushtë mes Federatës së Esports të Kosovës, institucioneve shtetërore dhe partnerëve ndërkombëtarë. Pjesëmarrës ishin edhe përfaqësues nga Federata Ndërkombëtare dhe ajo Evropiane e Esports, të cilët vlerësuan lart përkushtimin dhe standardet profesionale të këtij organizimi. Delegacionet e huaja u larguan nga Prishtina të impresionuara, duke lënë derën hapur për organizime të ardhshme madhështore në vendin tonë./Katror.info
