Ambasada e Francës në Kosovë ka njoftuar për nënshkrimin e një memorandumi strategjik mirëkuptimi mes Agjencisë Franceze për Zhvillim (AFD) dhe institucioneve kosovare për organizimin e Lojërave Mesdhetare Prishtina 2030.
Ky partneritet i rëndësishëm përfshin bashkëpunimin me Ministrinë e Kulturës, Rinisë dhe Sportit si dhe Ministrinë e Arsimit, Shkencës, Teknologjisë dhe Inovacionit të Kosovës, dhe synon zhvillimin e infrastrukturës sportive dhe edukative në funksion të këtij eventi ndërkombëtar, raporton Katror.info.
Objektivat kryesore të marrëveshjes:
- Ndërtimi i Fshatit të Sportistëve Mesdhetarë
- Rinovimi i objekteve sportive universitare
- Modernizimi i 12 palestrave të shkollave publike
“MKRS dhe MASHTI do të punojnë në bashkërendim të ngushtë për të avancuar zhvillimin e Fshatit të Atletëve në Kompleksin e Studentëve të Universitetit të Prishtinës, renovimin dhe adaptimin e Sallës së Sportit të Fakultetit të Edukimit Fizik dhe Sportit, si dhe modernizimin e dymbëdhjetë sallave sportive të shkollave publike të cilat do të shërbejnë si qendra zyrtare të trajnimit. Këto objekte do të përshtaten për të përmbushur nevojat operacionale të Lojërave dhe do të vazhdojnë të u shërbejnë sektorëve të arsimit dhe sportit edhe pas përfundimit të tyre,” thuhet në njoftimin e ambasadës.
Mundesh me e lexu edhe…
AFD, si institucioni publik francez për financim të zhvillimit, sjell përvojë të gjerë në mbështetje të iniciativave për zhvillimin e infrastrukturës në shkallë të gjerë dhe asistencës teknike. Përmes këtij MpM, AFD është pajtuar të financojë fazën fillestare të asistencës teknike për përgatitjen e projektit, duke integruar standardet më të larta teknike, mjedisore dhe shoqërore.
Bashkëpunimi do të mbështetet në përvojën institucionale të Francës, veçanërisht nga përvoja e Lojërave Olimpike dhe Paralimpike Paris 2024, dhe pasqyron zotimin e AFD për zhvillim urban të qëndrueshëm dhe gjithëpërfshirës, si dhe për përmbushjen e Objektivave Globale për Zhvillim të Qëndrueshëm.
Zëvendësministrja e Kulturës, Rinisë dhe Sportit, Daulina Osmani, e mirëpriti nënshkrimin si një hap të madh përpara, duke theksuar se partneriteti me AFD jo vetëm që mbështet organizimin e suksesshëm të Lojërave Mesdhetare, por kontribuon gjithashtu në prioritetet afatgjata zhvillimore të Kosovës në infrastrukturën e sportit dhe të rinisë.
Zëvendësministri i Arsimit, Shkencës, Teknologjisë dhe Inovacionit, Taulant Kelmendi, theksoi vlerën strategjike të këtij bashkëpunimi në transformimin e objekteve universitare dhe shkollore në mjedise moderne dhe funksionale që do t’u shërbejnë nxënësve për dekada të tëra.
Drejtori Rajonal i AFD për Ballkanin Perëndimor, Arnaud Dauphin, theksoi: “Agjencia Franceze për Zhvillim është e përkushtuar të mbështesë Kosovën në ofrimin e infrastrukturës gjithëpërfshirëse, cilësore dhe miqësore me mjedisin, me ndikim të qëndrueshëm shoqëror”.
Ky projekt nuk ka vetëm një fokus afatshkurtër për Lojërat Mesdhetare të vitit 2030, por synon të krijojë një trashëgimi të qëndrueshme në sport dhe edukim, duke kontribuar në zhvillimin e rinisë edhe pas përfundimit të ngjarjes.
Organizimi i Lojërave Mesdhetare në Prishtinë është një ngjarje historike për vendin dhe për rajonin, që pritet të sjellë mijëra sportistë, vizitorë dhe vëmendje ndërkombëtare. Kjo është një mundësi për Kosovën që të prezantohet si një qendër e re sportive dhe kulturore./Katror.info
