Muzeu i Luvrit në Francë do të instalojë 100 kamera të jashtme deri në fund të vitit 2026, si pjesë e masave për të forcuar sigurinë, pas grabitjes spektakolare të muajit të kaluar, ka bërë të ditur drejtoresha e tij, Laurence Des Cars të mërkurën.
Des Cars ka thënë gjithashtu në një seancë dëgjimore në Asamblenë Kombëtare se lidhjet me policinë e Parisit do të forcohen me instalimin e një “stacioni të avancuar policor brenda pronës së Luvrit”.
Vjedhja paraditen e 19 tetorit, gjatë të cilës katër grabitës u larguan me bizhuteri me vlerë rreth 90 milionë euro, ka ngritur dyshime mbi besueshmërinë e muzeut më të vizituar në botë si kujdestar për veprat e tij të panumërta.
Mundesh me e lexu edhe...
Ndërsa hetuesit kanë akuzuar katër të dyshuar të akuzuar për përfshirje në grabitje, stolitë e çmueshme ende nuk janë rikthyer.
Zyrtarët kanë pranuar se kishte mbulim të pamjaftueshëm të kamerave të sigurisë të mureve të jashtme të muzeut.
Pas grabitjes, zyrtarët francezë kanë thënë se muzeu do të vendoste siguri shtesë, duke përfshirë pajisje kundër ndërhyrjes dhe barriera kundër afrimit të automjeteve në rrugët publike aty pranë, deri në fund të vitit.
Një raport i publikuar muajin e kaluar nga organi publik i auditimit të Francës, i njohur si Cour des Comptes, ka thënë se pamundësia e muzeut për të përditësuar infrastrukturën e tij u përkeqësua nga shpenzimet e tepërta për veprat e artit./Koha/Katror.info
