Presidenti i Francës, Emanuel Macron, gjatë fjalës së tij në Samitin e Komunitetit Politik Europian në Tiranë, ka thënë se mbledhja e krerëve të shteteve në Tiranë, u jep shansin që të përballen me sfidat që kanë përpara duke pasur parasysh rrezikun e ndasisë që i kërcënon.
“Jemi në kohën kur jetët në vendet tona dhe situata në kontinentin tonë i sjell seriozitet këtij takimi”- tha Macron në Samit, më 16.05.2025.
Pikë së pari, ai tha se është lufta në Ukrainë. “Presidenti Volodymyr Zelensky e di se jemi pranë tij dhe kemi krijuar koalicione. Dhe, është shumë e rëndësishme të mbështetet Ukraina dhe armëpushimi”, tha ai.
Mundesh me e lexu edhe…
“Rusia nuk e do këtë armëpushim, por duhet t’i kthehet diskutimeve. Duhet të këmbëngulim që të sigurojmë një paqe në Ukrainë”- shtoi Macron.
I pari i Francës, tha se shpreson që do ketë një Traktat Paqeje mes Armenisë dhe Azerbajxhanit.
Ndër të tjera, ai përmendi edhe sigurinë ekonomike, duke shtuar se përfaqësojnë mbi 700 milionë banorë, që është “një treg shumë i madh” dhe më “me ndikim se sa tregu kinez”.
“Na duhet të rrisim bashkëpunimin duke hequr barrierat tregtare. Duhet që Europa e Madhe të jetë më e bashkuar nga pikëpamja tregtare. Duhet bërë më shumë edhe për integrimin rajonal dhe për zgjerimin”- theksoi Macron.
Tirana është mikpritësja e Samitit të gjashtë të Komunitetit Politik Europian, ku liderë, kryetarë shtetesh dhe qeverish nga 47 vende europiane, së bashku me drejtuesit e institucioneve kryesore europiane dhe ndërkombëtare do të mblidhen në Sheshin “Skënderbeu” për të diskutuar çështjet më të rëndësishme për kontinentin.
Ngjarja bashkë-organizohet nga presidenti i Këshillit Europian, António Costa, dhe Kryeministri i Shqipërisë, Edi Rama. Dy ditë më parë, Costa qëndroi në Kosovë, ku zhvilloi takime me presidenten e Kosovës, Vjosa Osmani dhe kryeministrin në detyrë, Albin Kurti.
Nën moton “Europa e re në një botë të re: unitet – bashkëpunim – veprim i përbashkët”, Samiti synon të forcojë dialogun dhe bashkëpunimin ndërmjet vendeve evropiane për siguri, demokraci dhe zhvillim të qëndrueshëm.
Pas një dreke zyrtare, liderët do ndahen në tryeza tematike dhe më pas në takime bilaterale.
Samiti do të përmbyllet me një sesion plenar dhe një konferencë të përbashkët për shtyp mes kryeministrit Rama dhe kryeministrit të Danimarkës – vendit mikpritës të samitit të ardhshëm në vjeshtë 2025.
Temat kryesore gjatë Samitit janë: siguria europiane dhe mbështetja për Ukrainën, forcimi i mbrojtjes dhe demokracisë, rritja e konkurrueshmërisë përmes inovacionit dhe investimeve, sfida të mobilitetit, përfshirë migrimin dhe lëvizjen e të rinjve.
Diskutimet do të zhvillohen në tri tryeza tematike: sigurimi i Europës dhe forcimi i rezistencës demokratike; një Europë për 600 milionë qytetarë: inovacion dhe siguri ekonomike dhe e treta: Europë e hapur me kufij të sigurt: sfidat e mobilitetit dhe fuqizimi i të rinjve
Përveç 27 vendeve anëtare të BE-së, në samit do të marrin pjesë edhe vende të Ballkanit Perëndimor, përfshirë Shqipërinë si vend mikpritës, Kosovën, Serbinë, Malin e Zi, Maqedoninë e Veriut dhe Bosnjë-Hercegovinën, si dhe liderë nga Mbretëria e Bashkuar, Ukraina, Turqia dhe shtete të tjera europiane. Të ftuar janë edhe sekretarët e përgjithshëm të NATO-s, Këshillit të Europës dhe OSBE-së. /Katror.info
Përgatiti:
