Festivali i shumëpritur Sunny Hill filloi të enjten mbrëma në Bërnicë të Poshtme, rreth dhjetë kilometra larg Prishtinës, me një natë spektakolare, që sharm i dha ylli global i pop muzikës, Bebe Rexha. Këngëtarja shqiptaro-amerikane, e njohur për vokalet e saj të fuqishme dhe prezencën dinamike në skenë, ishte atraksioni kryesor në ditën e parë të festivalit, i cili është i njohur për përzierjen e tij eklektike të talenteve vendore dhe ndërkombëtare.
Që nga muzgu, skena u dominua nga artistët vendorë, The Milk Snatchers, ZWADA, La Fazani e, Dafina Zeqiri, duke paralajmëruar një mbrëmje emocionuese.
Pak para orës 23:00, atmosfera arriti kulmin teksa Bebe Rexha doli në skenën kryesore, duke hapur performancën e saj me hitin “Me, Myself & I.”
Mundesh me e lexu edhe…
Pas këngës së tretë, Rexha përshëndeti publikun në shqip, duke shprehur gëzimin e saj që po performonte për herë të parë në Kosovë.
“Unë jam Bebe Rexha dhe jam shumë e lumtur që jam në Kosovë për herë të parë,” tha ajo, duke mbajtur një bluzë ku shkruhej “J’adore Prishtina.”
Rexha ftoi të gjithë që t’i bashkoheshin festës për unitet, duke bërë të qartë lidhjen e saj personale me vendin: “E kam prindin nga Dibra dhe gjakun e kemi një.”
Performanca e saj përfshinte një version unik të këngës “Say My Name,” duke përfshirë instrumente tradicionale shqiptare si çifteli dhe tupani, duke i dhënë një kthesë kulturore setit të saj.
Ajo magjepsi audiencën e larmishme, që përfshinte një numër të madh të rinjsh nga Kosova, vendet fqinje dhe jashtë.
Ndër të pranishmit në zonën VIP ishte edhe Dua Lipa, që së bashku me të atin, Dukagjin Lipa themeluan Sunny Hill Festival.
Nata vazhdoi me performanca nga artistë të tjerë të shquar, përfshirë DJ Regard, DJ i njohur ndërkombëtarisht nga Kosova, i cili mbajti energjinë e lartë deri vonë në natë. Festimet u shënuan gjithashtu nga një set i DJ Black Coffee, një tjetër artist i shquar që solli tingullin e tij unik në festival, duke argëtuar turmën pothuajse deri në agim.
Ky është edicioni i katërt i “Sunny Hill Festivalit”, por i pari në shtëpinë e vet në Bërnicë të Poshtme, një hapësirë e cila sipas organizatorëve ka kapacitet për 100 mijë veta për katër net. Këto janë edhe synimet e që e bëjnë këtë ngjarjen më të madhe muzikore në Evropën Juglindore.
Vendi i ri i festivalit ka pësuar një transformim të jashtëzakonshëm, duke krijuar një mjedis ideal për ngjarjen. Pas mbërritjes, vizitorët u pritën nga një sistem sigurie i koordinuar mirë me zona parkimi të caktuara, duke përfshirë hapësira të veçanta për pranimin e pjesëmarrësve të rregullt dhe atyre VIP. Festivali ka tri skena kryesore, secila e pajisur me ekrane gjigante duke bërë që të mos i ikë asgjë publikut.
Një tipar i dukshëm janë edhe flamujtë rozë që valëviteshin nëpër terren, pjesë e fushatës “A flag for her” (Një flamur për të) të festivalit. Kjo iniciativë e promovuar edhe nga Dua Lipa në profilin e saj në Instagram, synon sensibilizimin dhe solidarizimin me gratë në Kosovë.
“Ne po ngremë flamujt tanë rozë në solidaritet e protestë e për një qiell më të ndritshëm për gratë e vendit tonë. Mënyra se si i trajtojmë gratë tona është mënyra se si e tretim të ardhmen tonë dhe brezat e ardhshëm. Le të bashkohemi për të bërë zërin e tyre të dëgjohet! Duhet të qëndrojmë me nënat, vajzat, motrat tona! Le të dëgjohen gjithmonë zërat e tyre, të vlerësohen dhe të fuqizohen”, shkruhet në njoftimin e Festivalit.
Festivali Sunny Hill do të vazhdojë për tre netë të tjera, duke premtuar performanca dhe përvoja të tjera të paharrueshme. Me një fillim kaq të suksesshëm në shtëpinë e re festivali jo vetëm që nxjerr në pah skenën kulturore të gjallë të Kosovës, por edhe synon ta pozicionohet si një ngjarje e rëndësishme në kalendarin ndërkombëtar të festivaleve muzikore./Katror.info
Përgatiti:
