Mark Pjetraj, një aktivist nga Gjakova dhe person me shikim të dëmtuar, po udhëheq një iniciativë për të përmirësuar qasjen dhe gjithëpërfshirjen në hapësirat publike të qytetit të tij. Përmes përfshirjes në ekipin e Auditimit Social, ai ka luajtur rol të rëndësishëm në monitorimin e projekteve kapitale komunale, duke kontribuar në përmirësimin konkret të infrastrukturës për personat me nevoja të veçanta, shkruan Katror.info.
Pjetraj është pjesë e projektit DEMOS, i cili mbështetet nga Bashkimi Evropian në Kosovë, Zvicra dhe Suedia, dhe zbatohet nga Helvetas Kosova. Projekti përfshin ekipe qytetare të cilat në mënyrë vullnetare monitorojnë investimet që financohen nga Granti për Performancën Komunale.
Përmes këtij angazhimi, ai dhe kolegët e tij kanë bërë rekomandime konkrete për përmirësimin e qasjes, duke u bazuar në përvojat e tyre personale. Një ndër sukseset kryesore ishte avokimi për vendosjen e shiritave orientues për personat e verbër në qendrën e qytetit të Gjakovës.
Mundesh me e lexu edhe...
“Falë përkushtimit të qytetarëve aktivë dhe vullnetit të komunës, përmes Auditimit Social kemi arritur të avokojmë me sukses për vendosjen e shirita orientues sipas standardeve dhe të mundësojmë qasje më të lehtë për personat e verbër. Tani të verbërit kanë të njëjtën qasje si çdo qytetar tjetër,” tha Pjetraj gjatë një ceremonie ku u vlerësua puna e ekipeve audituese.
Në bazë të këtyre rekomandimeve, Komuna e Gjakovës ka ndërmarrë hapa konkretë për përmirësimin e infrastrukturës, duke zgjeruar shiritin taktil në 40 centimetra dhe duke u zotuar për eliminimin e pengesave që kufizojnë lëvizjen e lirë të personave me aftësi të kufizuara./Katror.info.
