Ministria e Arsimit, Shkencës, Teknologjisë dhe Inovacionit (MAShTI) ka njoftuar se të shtunën, më 21 qershor 2025, duke filluar nga ora 10:00, do të mbahet Provimi i Maturës Shtetërore, shkruan Katror.info.
Në këtë provim pritet të marrin pjesë rreth 18.800 maturantë nga mbarë vendi, ndërsa rezultatet pritet të publikohen më së largu deri më 30 qershor.
”Ministria e Arsimit, Shkencës, Teknologjisë dhe Inovacionit (MAShTI), njofton të gjithë maturantët se, nesër, më datë 21 qershor 2025, duke filluar nga ora 10:00 do të mbahet Provimi i Maturës Shtetërore. Provimit do t’i nënshtrohen 18.800 maturantë kurse rezultatet do të bëhen publike më së largu deri më 30 qershor”, thuhet në njoftim.
Mundesh me e lexu edhe…
Sipas njoftimit zyrtar, MAShTI ka ndërmarrë të gjitha masat e nevojshme për organizimin e procesit, përfshirë angazhimin e trupave mbikëqyrëse dhe përgatitjen e infrastrukturës për zhvillimin e rregullt të testimit.
”MAShTI ka angazhuar gjithashtu trupa lëvizëse dhe ekspertë të IT-së për të monitoruar nga afër dhe nga distanca mbarëvajtjen e procesit. Çdo përpjekje për të dëmtuar apo shkelur rregullat e përcaktuara do të trajtohet me masa të menjëhershme ligjore”, theksohet në njoftim.
Ministria u ka bërë thirrje të gjithë nxënësve që t’u përmbahen rregullave të përcaktuara, duke përfshirë ndalimin e pajisjeve elektronike si telefonat mobil, të cilat nuk do të lejohen brenda qendrave të testimit.
”Për të siguruar një proces të drejtë, të rregullt dhe të besueshëm, Ministria e Arsimit lutë të gjithë maturantët që t’u përmbahen rregullave të përcaktuara, si: mosmbajtja me vete e telefonave apo pajisjeve të tjera elektronike, pasi nuk do të lejohet hyrja në qendrat e testimit për ata që mbajnë pajisje të tilla.MAShTI gjithashtu njofton se, hyrja në qendrën e testimit do të mbyllet në ora 10:00. Pas kësaj ore, nuk do të lejohet hyrja e asnjë personi të paautorizuar nga MAShTI deri në përfundimin e testit”, thuhet tutje në njoftim.
Në fund të njoftimit, MAShTI ka uruar të gjithë maturantët për një provim të mbarë, duke u dëshiruar të gjithë maturantëve suksese në realizimin e qëllimeve të tyre akademike. /Katror.info
Përgatiti:
