Jonathan Hargreaves, Ambasador i Mbretërisë së Bashkuar në Kosovë, ka theksuar se Mbretëria e Bashkuar dhe Bashkimi Evropian kanë negociuar një partneritet të ri, dhe tani Kosovës i duhet një lidership i gatshëm të marrë iniciativën dhe të punojë me ta.
Në një tekst të dërguar për botim në Gazetën Express, Hargreaves ka shkruar se liderët e Mbretërisë së Bashkuar dhe të Bashkimit Evropian kanë mbajtur samitin e parë MB-BE në Londër, duke arritur një marrëveshje për një partneritet strategjik të ri, i cili fokusohet në siguri, mbrojtje dhe bashkëpunim për zhvillim. Ky partneritet, siç ka theksuar ai, vendos qytetarët në qendër të marrëdhënieve, forcon ekonomitë, mbron planetin dhe burimet e tij, si dhe avancon interesat e ndërsjella në fushën e sigurisë së brendshme, bashkëpunimit gjyqësor dhe migrimit të parregullt.
Hargreaves ka pranuar se arritja deri në këtë pikë ka qenë një sfidë e madhe politike, duke kujtuar se referendumi i vitit 2016 për Brexit la pasoja në të dy anët. Ai ka theksuar se Qeveria britanike ka punuar shumë me partnerët evropianë për të gjetur kompromise dhe për të tejkaluar dallimet në çështje të ndjeshme.
Mundesh me e lexu edhe…
Duke iu referuar vizitës së sekretarit britanik për Punë të Jashtme, David Lammy, në Kosovë gjatë prillit, Hargreaves ka rikujtuar se kjo vizitë theksoi ngrohtësinë dhe forcën e marrëdhënieve mes Mbretërisë së Bashkuar dhe Kosovës. Ai ka përmendur vizionin e ish-kryeministrit Tony Blair për një Kosovë që përcakton të ardhmen e saj, jeton në paqe me fqinjët dhe mbron të drejtat e të gjithë qytetarëve.
Në tekstin e tij, ambasadori britanik ka theksuar se sekretari Lammy ka bërë thirrje për vendosmëri nga liderët politikë të Kosovës përgjatë gjithë spektrit politik. Sipas tij, Kosova ka nevojë për një urgjencë të re politike dhe për të shmangur që e ardhmja e saj të përcaktohet nga veprimet e të tjerëve. Ai ka inkurajuar Kosovën që të ofrojë pragmatizëm dhe jo pozicione puriste, duke e krahasuar këtë me marrëdhënien e re mes Mbretërisë së Bashkuar dhe BE-së.
Hargreaves ka theksuar se disa vende të Ballkanit Perëndimor po shënojnë përparim drejt integrimit evropian dhe se, nëse ka hapa konkretë drejt paqes në Ukrainë, mund të përshpejtohet edhe progresi i rajonit. Ai ka shprehur dëshirën e Mbretërisë së Bashkuar që ta shohë Kosovën pjesë të NATO-s, kur mekanizmat e saj të mbikëqyrjes të përmbushin standardet. Për këtë, ai ka kërkuar diplomaci aktive dhe marrje vendimesh të vështira, veçanërisht për normalizimin e marrëdhënieve me Serbinë.
Ambasadori britanik ka thënë se Kosova duhet të avancojë interesat e saj, duke shprehur mbështetje për anëtarësimin e saj në Këshillin e Evropës, kur të ketë bindur shtetet anëtare se korniza e saj ligjore mbështetet nga një angazhim real për të mbrojtur komunitetet joshumicë.
Në këtë shkrim, Hargreaves ka kritikuar veprimet e javëve të fundit në veri të Kosovës, duke thënë se ato u kanë mohuar fëmijëve dhe qytetarëve të zakonshëm nga komuniteti serb qasjen në shërbime të përditshme dhe kanë minuar pretendimin e Kosovës se të gjithë qytetarët janë të mirëpritur dhe të mbrojtur.
Ai ka bërë të ditur se në vjeshtë, Mbretëria e Bashkuar do të jetë mikpritëse e Samitit të Procesit të Berlinit në Londër, ku liderët e rajonit do të mblidhen për të avancuar qëllime të përbashkëta për rritje ekonomike, bashkëpunim rajonal dhe integrim evropian. Sipas tij, përgatitjet për këtë ngjarje po udhëhiqen nga e dërguara speciale britanike për Ballkanin Perëndimor, Karen Pierce, në bashkëpunim të ngushtë me Kosovën dhe partnerët e tjerë.
Në analizën e tij, Hargreaves ka vlerësuar se Ballkani Perëndimor ka potencial të madh, por përballet me sfida reale, si tensionet etnike të nxitura nga retorika përçarëse, veprimet e aktorëve të jashtëm, rrjetet kriminale që shfrytëzojnë paqëndrueshmërinë, korrupsioni që minon sundimin e ligjit dhe dhuna me bazë gjinore si një shkelje e rëndë e të drejtave të njeriut.
Ai ka theksuar se Kosova ka një rol kyç në trajtimin e këtyre sfidave dhe në formësimin e së ardhmes së rajonit, por për këtë duhet të jetë politikisht e përgatitur. Në këtë kontekst, ai ka bërë thirrje për lidership, duke shtuar se qytetarët e Kosovës meritojnë një qeveri që vepron në interes të tyre dhe që i përfaqëson ata në arenën ndërkombëtare.
Hargreaves ka kujtuar se këtë javë Kosova do të presë përfaqësuesen e lartë të BE-së, Kaja Kallas, dhe përfaqësuesin e posaçëm, Peter Sorensen, ndërsa ka theksuar se marrëdhënia e re mes Mbretërisë së Bashkuar dhe BE-së nënkupton bashkëpunim më të ngushtë për të mbështetur progresin që sjell përfitime për qytetarët e Kosovës dhe të Serbisë.
Në përmbyllje, ambasadori britanik ka shprehur shqetësim për situatën aktuale politike në Kosovë, duke theksuar se vendi është pa parlament dhe pa qeveri funksionale. Ai i ka bërë thirrje lidershipit të Kosovës që të bashkohet, të formojë sa më shpejt institucionet dhe të fokusohet në prioritetet që kanë më shumë rëndësi për qytetarët: mundësitë ekonomike, përfshirjen sociale dhe stabilitetin rajonal. /Gazetaexpress /Katror.info
Përgatiti:
