Në Prishtinë u mbajt të enjten konferenca e parë ndërkomunale për arsimin në rajonin e kryeqytetit, me pjesëmarrjen e përfaqësuesve të komunave Prishtinë, Obiliq, Fushë Kosovë dhe Lipjan, raporton Ekonomia Online.
Kryetarë dhe nënkryetarë komunash theksuan rëndësinë e bashkëpunimit rajonal për të përballuar sfidat e përbashkëta në sistemin arsimor dhe për të ndarë praktikat pozitive në funksion të përmirësimit të cilësisë së arsimit.
Kryetari i Prishtinës, Përparim Rama, tha se qëllimi i kësaj konference nuk është garimi ndërmjet komunave, por shkëmbimi i ideve dhe përvojave që mund të ndihmojnë zhvillimin e arsimit në nivel rajonal.
Mundesh me e lexu edhe…
“Po takohemi jo si komuna fqinje, por po vijmë të bashkuar për gjithë këtë rajon për t’i shkëmbyer idetë tona, proceset pozitive që mendojmë se mundemi t’i ndajmë me njëri-tjetrin, që mund t’i ndihmojmë njëri-tjetrit. Zhvillimi i vendit tonë nuk varet vetëm nga institucionet lokale, qendrore, ministritë, por duhet të bashkëpunojmë të gjithë që t’i adaptohemi edhe zhvillimeve të reja në aspektin e zhvillimeve teknologjike, zhvillimeve të inteligjencës artificiale. Ideja nuk është e garës se cila komunë po qëndron më mirë, por të shkëmbejmë ide, procese edhe sfidat që i kemi kaluar”, tha Rama.
Ai foli edhe për zbatimin e mësimit të turnit të plotë në Prishtinë, të cilin e vlerësoi si hap pozitiv.
“Kemi marrë disa procese, të cilat kanë qenë paksa sfiduese por janë më se të nevojshme në zhvillimin e arsimit në kryeqytet. Mësimi i turnit të plotë, të cilin e kemi filluar me pesë shkolla, ka pasur impakt pozitiv edhe për fëmijët dhe ngritjen e nivelit. Me elemente ekstra-kurrikulare si arti, sporti, shprehja publike, drama, teatri, elemente të tjera kreative që sot janë në aspektet e industrisë kreative”.
Në digjitalizimin e klasave, ne kemi vazhduar tash tri vite që të digjitalizohet kurrikula, që të mos varemi shumë nga mësuesit dhe profesorët individual. Kemi investuar në tabela të mençura – 400 prej 600 klasave i kemi me tabela të mençura, deri në fund të vitit planifikojmë që t’i bëjmë të gjitha”, tha ai.
Kryetari i Obiliqit, Xhafer Gashi, tha se arsimi ka qenë prioritet për komunën e tij dhe bashkëpunimi ndërkomunal është domosdoshmëri.
“Ne kemi bashkëpunime në sfera të ndryshme të bashkëpunimeve ndërkomunale. Do të nxjerrim edhe sfida të ndryshme, por edhe bashkëpunime që janë të domosdoshme. Të njëjtat janë të gjitha sfidat në komuna rreth shkollave. Ne kemi pasur fokus të veçantë arsimin dhe cilësinë e arsimit. Kemi arritur jashtëzakonisht shumë në kuptimin e mbështetjes. Mirëpo në vazhdimësi, duke qenë si komuna fqinje, ka hapësirë për bashkëpunim dhe krijimin e mundësive të mira duke shfrytëzuar përvojat nga secila komunë. Kemi arritur shumë që shkollat të pajisen, të jenë të përgatitura për mbarëvajtjen e mësimit. Kemi krijuar një pishinë gjysmë-olimpike për nxënësit tanë”, tha ai.
Nënkryetari i Fushë Kosovës, Besnik Osmani, foli për sfidat që ka kjo komunë për shkak të rritjes së shpejtë të popullsisë.
“Jemi një rast më specifik për arsye të rritjes së madhe të popullsisë. Ne përafërsisht kemi 400-500 nxënës në vit që po shtohen, që i bie përafërsisht një shkollë e re që brenda vitit duhet të jetë e gatshme për të absorbuar ardhjet e reja. Problemi ynë është përgjigja me personel mësimdhënës. Kemi një paradoks ligjor: komunat janë të obliguara që të sigurojnë mësimin e obligueshëm dhe në anën tjetër nuk kanë kapacitetet e nevojshme financiare që të sigurojnë këtë mësim. Po flasim për personelin. Kemi diku 150 norma që na mungojnë”, tha ai.
Nënkryetari i Lipjanit, Diamant Bytyqi, vlerësoi nismën si të qëlluar dhe theksoi nevojën për ndarjen e përvojave.
“Janë tema të përbashkëta që duhet të shkëmbejmë përvoja, pasi që sfidat janë të njëjta. Një iniciativë shumë e qëlluar nga kryeqyteti që na ofron një bashkëpunim dhe shkëmbim të përvojave. Patjetër që duhet një bashkëpunim komunal. Ne të gjitha shkollat i kemi të rinovuara. E kemi parë që Prishtina ka bërë mësimin turn ditor. Për ne, imigrimi brenda komunal nga fshatrat në qytet e ka rritur numrin e nxënësve në qytet, por ka zvogëluar numrin e nxënësve në fshatra. Ne kemi filluar përgatitjet e para për të filluar mësimin turn ditor në shkolla në fshatra. Migrimi i të rinjve, qasja me nxënësit me nevoja të veçanta sigurisht që kërkon personel shtesë, por që ne e shohim shumë të nevojshëm bashkëpunimin ndërkomunal”, tha ai./EO/Katror.info
