Mbretëria magjike nëntokësore në Slloveni

Nëntoka fsheh mrekulli të pabesueshme dhe një e tillë ndodhet në Slloveni, një vend me natyrë të bukur, male, pyje, liqene, qytete dhe kështjella, që është gjithmonë një ide e mirë për një udhëtim.

Nëse jeni duke kërkuar për një vend me bukuri të pabesueshme dhe statistika akoma më të pabesueshme, i cili është përfshirë në Listën e Trashëgimisë Botërore të UNESCO-s për shkak të rëndësisë dhe veçantisë së tij, drejtohuni në Shpellat e Shkocjanit. Ky vend me famë botërore fsheh një nga kanionet nëntokësore më të mëdha në botë.

Kanioni i pabesueshëm i lumit Reka

Le të nisim nga fillimi, dhe fillimi është ‘fajtori’, në këtë rast, lumi Reka, i cili afër fshatit Shkocjan zhduket në thellësi të tokës, pra në shpellat e Shkocjanit dhe vazhdon rrjedhën e tij, kësaj here nën tokë, për 34 kilometra të pabesueshme derisa të dalë sërish mbi sipërfaqe, në Itali.

Pikërisht lumi, pra vepra e rrjedhës së tij, është atuti kryesor që i veçon Shpellat e Shkocjanit nga plejada e shpellave imponuese botërore si një vend vërtetë të veçantë.

Një kanion i jashtëzakonshëm nëntokësor rreth 3.5 kilometra i gjatë, midis 10 dhe 60 metra i gjerë dhe në disa vende i lartë deri në 140 metra, shkëlqimi i të cilit mund të shihet në pjesën e shpellës së quajtur Shumeqa jama, kanali i Hankes që vazhdon deri në të dhe deri te një nga sallat më të mëdha të shpellave në botë.

Vetë sistemi i shpellave është edhe më kompleks. Gjatësia totale e të gjitha kalimeve të shpellës është rreth gjashtë kilometra, ndërsa diferenca vertikale në lartësi midis pikës më të lartë, hyrjes dhe pikës më të ulët të shpellës që njeriu ka arritur deri më tani, pra sifonit të shpellës, është 205 metra.

Kanioni i përshkruar ndonjëherë zgjerohet në dhoma të mëdha nëntokësore, domethënë salla. Ndër to, dhoma e Martelit dallohet për përmasat e saj, e cila njihet si një nga më të mëdhatë në Evropë, por edhe në botë, me një vëllim mbresëlënës prej 2.2 milionë metra kub.

Kjo sallë e madhe është 308 metra e gjatë, mesatarisht 89 metra e gjerë (gjerësia maksimale e saj është 123 metra), ndërsa e lartë 106 metra. Është padyshim salla më e madhe e zbuluar deri më tani në Slloveni.

Ajo që tani i zbulohet vëzhguesit në sipërfaqe, jashtë vetë kompleksit të shpellës dhe që dikur ishte e fshehur, është gjithashtu një gjë  interesante. Bëhet fjalë për Luginën e Madhe, deri në 165 metra thellësi, në të cilën lumi zhduket nën tokë dhe Lugina e Vogël 120 metra e thellë.

Ato u krijuan disa qindra mijëra vjet më parë, nga shembja e çatisë së strukturës së shpellës. Sot dy luginat ndahen nga një urë natyrore, mbetjet e një qemeri të shembur dhe gjithçka e përshkruar ndodhet pikërisht pranë fshatit Shkocjan, ku ndodhet humnera e Okroglicës 90 metra e thellë.

Në vetë kanionin spikat ura e Cerkvenikut, e vendosur në lartësinë 47 metra mbi lumin Reka. Ndër ‘mrekullitë’ e tjera dallohen i ashtuquajturi stalagmiti gjigant 15 metra i lartë, por edhe rreth 30 ujëvara dhe pragje të larta deri në 10 metra.

Ajo që është interesante është se kanioni nëntokësor, pavarësisht përmasave rekord, ka një sifon relativisht të vogël që gjatë reshjeve të dendura nuk mund të përballojë sasinë e madhe të ujit që rrjedh poshtë tij. Niveli i ujit ndonjëherë mund të rritet me 100 metra.

Hyrja në dhjetor, janar, shkurt dhe mars është 16 euro për të rritur dhe 7.5 për fëmijë.

Hyrja për fëmijët deri në gjashtë vjeç është falas. /Katror.info