Fondi për të Drejtën Humanitare ka inauguruar të shtunën Memorialin Pema e Jetëve kushtuar personave të zhdukur gjatë luftës së fundit në Kosovë.
Memoriali është ngritur në platonë mbi parkingun nëntokësor, pranë sheshit “Xhorxh Bush” në Prishtinë dhe përkon me Ditën e Personave të Pagjetur në Kosovë.
Pema e Jetëve, e konceptuar nga artistët Dea Gjinovci dhe Armand de Benoist de Gentissart, paraqet një trung pa pemë, simbol i jetëve të ndërprera dhe boshllëkut që ka lënë mungesa e tyre.
Mundesh me e lexu edhe…
Brenda tij, në panele druri, janë gdhendur emrat e personave të pagjetur, disa prej tyre të shkruar edhe me dorën e vet familjarëve, duke krijuar një lidhje të përhershme mes kujtimit dhe dashurisë.
Bekim Blakaj drejtor ekzekutiv i Fondit për të Drejtën Humanitare përshkroi ngritjen e këtij memoriali jo vetëm si një vepër arti, por edhe një hapësirë e përhershme për përkujtim kolektiv, një vend ku dhimbja bëhet e përbashkët dhe historia nuk lejohet të harrohet.
Kryetari i Prishtinës Përparim Rama tha se Memoriali Pema e Jetëve është një vendtakim i kujtesës kolektive për personat e pagjetur tash e sa vjet pas përfundimit të luftës në Kosovës.
Memoriali është realizuar nga Fondi për të Drejtën Humanitare në partneritet me Qendrën Burimore për Personat e Zhdukur dhe u mbështet nga Zyra e Bashkimit Evropian në Kosovë dhe Departamenti Federal i Zvicrës për Punë të Jashtme.
“Sot, në Ditën Ndërkombëtare të Personave të Zhdukur qëndruam pranë familjeve, shoqërisë civile dhe institucioneve në inaugurimin e memorialit “Pema e Jetëve” në Prishtinë.
Ky monument i gjallë, i krijuar nga artistët Dea Gjinovci dhe Armand de Benoist de Gentissart, nderon të gjithë ata që u zhdukën me dhunë si pasojë e luftës në Kosovë. Ai qëndron si një vend kujtese, dinjiteti dhe reflektimi — por edhe si një thirrje për të vërtetën dhe drejtësinë,” ka shkruar Zyra e Bashkimit Evropian në Kosovë.
Edhe 26 vjet pas përfundimit të luftës në Kosovë nuk dihet ende për fatin e rreth 1600 personave./Katror.info
Përgatiti:
