Dëmtimi dhe shkatërrimi i hapësirave publike, veçanërisht shkollave, jo vetëm që dëmton infrastrukturën fizike, por edhe minon vetë themelin e një shoqërie të emancipuar.
Kështu, drejt krijimit të një komuniteti të përgjegjshëm dhe me ndjeshmëri ndaj hapësirave shkollore po angazhohet mësuesja Durije Zeneli Hyseni bashkë me disa nga mësimdhënësit e tjerë të shkollës “Mihal Grameno” në Fushë Kosovë.
Kësaj radhe ajo bashkë me disa mësimdhënës dhe nxënës ka vendosur që të mbulojë me ngjyra të hijshme muret e dëmtuara të shkollës.
Mundesh me e lexu edhe…
” Kemi bërë një iniciativë për me i ngjyrosë muret e shkollës që janë të shkarravitura me fjalë jo të hijshme për shkollën.” – Durije Zeneli Hyseni –
Mësuesja shpjegon se iniciativa ka për qëllim përmirësimin e hapësirave të përbashkëta brenda shkollën dhe ndërgjegjësimin e nxënësve, prindërve dhe banorëve të lagjes që të ruajnë shkollën dhe të mos shkarravisin muret.
” Shkolla jonë është një shkollë shumë e madhe. Përpos që është një shkollë e madhe, ka edhe një rreth të gjerë shumë dhe shumica e fëmijëve, por edhe prindërve ndoshta nuk janë sa duhet të ndërgjegjësuar që nuk duhet të shkruhen muret.” – Durije Zeneli Hyseni –
Ajo thotë se këtë iniciativë e ka nisur bashkërisht me disa nga arsimtaret dhe shtëpiakun e shkollës dhe po e vazhdon edhe me nxënëset e gjeneratës
” Aktivitetet gjithmonë janë të pranishme në shkollën tonë. Secili mësimdhënës me atë mundësinë e vet bën aktivitete të ndryshme. Mirëpo, arsimtari Burim dhe unë jemi pak më aktiv në këtë aspektin e vullnetarizmit edukativ dhe me i vetëdijësu fëmijët e nxënësit dhe të gjithë, që duhet me punu ma shumë për shkollën. Shkolla është e të gjithëve.” – Durije Zeneli Hyseni –
Durija shpjegon se falë kontributeve vetanake të arsimtarëve, ndihmesës së prindërve, dhe fondit të shkollës ata kanë arritur që të sigurojnë ngjyrat dhe mjetet e nevojshme për realizimin e këtij aktivitetit.
” E morëm iniciativën, pak me ndihmën tonë – sepse, edhe kjo është me rëndësi, se buxhet s’po kemi mjaftueshëm – edhe pak na kanë ndihmu disa prindër, por edhe disa buxhet që është në kuadër të shkollës është shfrytëzuar pak dhe e kemi bërë, që të kemi një buxhet të mjaftueshëm, por jo të bollshëm për me e ba pak më të bukur shkollën.” – Durije Zeneli Hyseni –
Sipas mësueses, arsimtarët bashkë me nxënësit thuajse çdo vit ndërmarrin iniciativa të ngjashme, sidomos në përmirësimin e imazhit të shkollës dhe hapësirës rreth saj, meqë përgjatë pushimeve verore të rinjtë e lagjes e dëmtojnë atë. E për ta mirëmbajtur dhe ruajtur hapësirën shkollore, ajo ka një mesazh edhe për prindërit.
” Mendoj që edhe prindërit është mirë të mos e lënë vetëm në dorën tonë, por le të jetë edhe iniciativë e prindërve. Pse mos me ardhë me na ndihmu edhe prindërit?! Edhe ata janë pjesë e komunitetit.” – Durije Zeneli Hyseni –
E ani pse përzgjedhja e ngjyrave mund të duket e rëndomtë, disa prej tyre kanë një mesazh. Kështu, për muajin e ndërgjegjësimit për kancerin e gjirit, një pjesë e mureve jashtë shkollës është mbuluar tërësisht me ngjyrën rozë.
” Njëra nga arsyet ka qenë vetëdijësimi dhe ndërgjegjësimi i grave për ta bërë mamografinë dhe që sa më herët ta zbulojnë kancerin e gjirit.” – Durije Zeneli Hyseni –
Sipas Durijes, aktivitete e iniciativa të tilla vetëm na e kujtojnë se me pak punë e angazhim mund të kultivohet një ndjenjë e përgjegjësisë kolektive për hapësirat e përbashkëta. E kujdesi ndaj ambientit dhe infrastrukturës përreth nesh ndikon në përmirësimin e jetës dhe mirëqenies së të gjithëve.
” Punoni. Asnjëherë mos thoni se (vendi) është i dikujt. Gjithmonë puno me atë mendimin që është e jotja. Nëse hedh një mbeturinë, mendoje që po e hedh në shtëpinë tënde. Nëse e shkruan një muri, mendo që po e shkruan murin e shtëpisë tënde. Nëse nisesh nga vetja, mendoj se gjithçka ka me qenë mirë.” – Durije Zeneli Hyseni –
Edicionin #29 të plotë e gjeni KËTU 🙂
Përgatiti:
