Meta ka njoftuar se së shpejti do të shfaqë reklama dhe përmbajtje të tjera për përdoruesit, të bazuara në ndërveprimet e tyre me asistentin digjital të kompanisë dhe produktet e tjera të fuqizuara nga inteligjenca artificiale gjenerative.
Gjiganti i rrjeteve sociale tha se ndryshimi në sistemin e rekomandimeve do të hyjë në fuqi më 16 dhjetor, ndërsa përdoruesit do të njoftohen për përditësimin duke filluar nga 7 tetori.
Ky hap tregon përpjekjet e Metës që të lidhë më ngushtë miliarda dollarë investime në AI gjenerative me biznesin e saj kryesor – reklamimin online, shkruan CNBC, transmeton Katror.info.
Mundesh me e lexu edhe...
Meta gjatë verës nisi një fushatë të madhe punësimesh dhe shpenzimesh në fushën e AI, duke paralajmëruar se projektet e reja do të rrisin ndjeshëm shpenzimet në vitet 2025–2026.
Asistenti digjital Meta AI tashmë është i integruar në aplikacione si Facebook, Instagram, WhatsApp dhe Messenger, por ofrohet edhe si aplikacion dhe faqe e veçantë. Përdoruesit mund të bisedojnë me të ngjashëm me ChatGPT, duke kërkuar udhëzime apo krijimin e imazheve nga prompt-et e tyre.
Meta ka konfirmuar se Meta AI përdoret nga mbi 1 miliard përdorues aktivë në muaj. Vetë Mark Zuckerberg ka theksuar se në të ardhmen do të hapen mundësi për rekomandime të sponsorizuara apo shërbime me pagesë për përdorim më të avancuar.
Menaxherja e politikave të privatësisë në Meta, Christy Harris, tha se kjo është një zgjerim natyral i personalizimit dhe se përdoruesit duhet të informohen qartë për këtë ndryshim. Ajo solli shembullin kur një përdorues pyet Meta AI për planifikimin e pushimeve familjare – rekomandimet në Facebook mund të përfshijnë video Reels për destinacione turistike, si dhe reklama për hotele apo udhëtime.
Meta ka konfirmuar se edhe ndërveprimet përmes zërit me syzet Ray-Ban Meta do të ndikojnë në motorin e rekomandimeve. Megjithatë, bisedat përmes WhatsApp nuk do të përfshihen, përveç rasteve kur përdoruesit lidhin llogaritë me Instagram ose aplikacione të tjera të Metës.
Ndryshimi i ri nuk ofron mundësi opt-out – pra, përdoruesit nuk mund ta çaktivizojnë. Por nëse nuk përdorin Meta AI, atëherë përditësimi nuk do të ketë efekt për ta.
Meta ka shtuar se ky funksion do të prezantohet në Mbretërinë e Bashkuar dhe Bashkimin Evropian pas përditësimeve të zakonshme rregullatore. /Katror.info
Burimi: CNBC
Përktheu dhe përshtati: Katror.info
