Me kalimin e kohës, shkencëtarët po gjejnë mikroplastikë në gjithnjë e më shumë vende. Ajo u zbulua në ujin e pijshëm, ushqim, ajër dhe madje edhe në gjak. Tani është zbuluar se këto grimca të vogla mund të ndikojnë edhe në mot. Në mënyrë të veçantë, ekspertët gjetën mikroplastikë në shumicën e mostrave të reve të marra nga maja e një mali në Kinë. Ata gjurmuan lëvizjet e saj dhe zbuluan se mund të luante një rol në formimin e reve.
Mikroplastika janë copa të vogla plastike jo më të mëdha se pesë milimetra. “Është kudo. Mikroplastik gjendet në ajrin që thithim, në ujin e pijshëm, në trupin tonë,” tha për CNN Judith Enck, presidente e organizatës mjedisore Beyond Plastics. Këto grimca krijohen gjatë zbërthimit të pjesëve më të mëdha të plastikës, pavarësisht nëse është një proces kimik apo prishje fizike. “Nëse keni plastikë, herët a vonë do të merrni mikroplastikë”, tha Enck.
Sa më e vogël të jetë mikroplastika, aq më lehtë qarkullon nëpër mjedis dhe përfundimisht mund të përfundojë edhe në trupin tonë. Nuk dihet ende se si këto grimca të vogla ndikojnë në shëndetin tonë, por ka indikacione se ato mund të jenë të dëmshme.
Mundesh me e lexu edhe…
Në një studim të ri, shkencëtarët kanë zbuluar se mikroplastika ndikon në formimin e reve dhe retë kanë një rëndësi të madhe për motin. Gjegjësisht, retë krijojnë reshje në formë shiu dhe bore. Ato gjithashtu bllokojnë rrezet e diellit dhe sasia më e ulët e rrezatimit diellor nënkupton temperatura më të ulëta.
Në mënyrë që të formohet një re, avujt e ujit duhet të shndërrohen në pika uji – lëng, të cilat më pas bashkohen për të formuar retë. Pikat formohen kur avulli i ujit ndërvepron me grimcat e vogla në atmosferë, si pluhuri, hiri ose kripa e oqeanit. Sipas studimit, formimi i tyre mund të ndikohet edhe nga mikroplastika.
Grimcat e plastikës janë hidrofile, që do të thotë se ato tërheqin ujin. Kur pikat e para të ujit ngjiten në mikroplastikë dhe grimca të tjera të vogla, edhe më shumë pika mblidhen dhe formojnë re. Ekspertët thonë se nevojiten kërkime të mëtejshme për të përcaktuar shkallën e saktë në të cilën mikroplastika ndikon në formimin e reve./Katror.info
Përgatiti:
