Ministria e Industrisë, Ndërmarrësisë dhe Tregtisë (MINT) ka marrë vendim për vendosjen e masave mbrojtëse për çmimet e produkteve të naftës të përdorshme në transport, me qëllim mbrojtjen e konsumatorëve dhe garantimin e konkurrencës së ndershme në tregun e brendshëm, shkruan Katror.info.
Ky vendim është rezultat i mbikëqyrjes së vazhdueshme të tregut të naftës, duke u bazuar në të dhënat ditore të Doganës së Kosovës dhe raportet e Inspektoratit Qendror të Mbikëqyrjes së Tregut. Nga vëzhgimet është konstatuar se ndryshimet në çmimet e importit pasqyrohen me rritje të menjëhershme në treg, ndërsa uljet nuk reflektohen në të njëjtën mënyrë, duke krijuar pabarazi në koston që bartin konsumatorët.
Për të rregulluar këtë praktikë, MINT ka përcaktuar një marzhë tregtare maksimale të lejuar për shitjen e produkteve të naftës, ku për shitjen me shumicë lejohet një fitim deri në 2 eurocent për litër, ndërsa për shitjen me pakicë deri në 12 eurocent për litër. Vendimi hyn në fuqi një ditë pas publikimit në Gazetën Zyrtare të Republikës së Kosovës.
Mundesh me e lexu edhe…
Në kuadër të zbatimit të këtyre masave, do të ketë një mbikëqyrje të shtuar nga Inspektorati i Tregut, në bashkëpunim me Doganën dhe Administratën Tatimore të Kosovës, për të siguruar respektimin e rregullave të reja.
Sipas MINT, kjo ndërhyrje është një hap i domosdoshëm për të ruajtur një treg funksional dhe të drejtë, duke garantuar që qytetarët të mos pësojnë padrejtësisht nga luhatjet jo të balancuara të çmimeve në tregun e derivateve./Katror.info
