Temperaturat e larta, nga të cilat është përfshirë edhe Kosova, e kanë rritur shqetësimin për përkeqësim të shëndetit të një kategorie të qytetarëve. Mjekët kanë apeluar që të moshuarit, fëmijët dhe të sëmurët kronikë të mos i ekspozohen diellit gjatë orëve të pikut.
Kosova është përfshirë nga valë e të nxehtit, e cila do të vazhdojë edhe javën e ardhshme.
Profesionistë shëndetësorë apeluan që, në ditët kur temperaturat kapin 35 gradë celsius, kujdes të shtuar duhet të tregojnë veçanërisht të moshuarit, gratë shtatzëna dhe fëmijët.
Mundesh me e lexu edhe…
“Temperaturat e larta normalisht që janë të rrezikshme për çdo qytetar, mirëpo në fokus të veçantë janë personat e moshuar, personat me sëmundje kronike, gratë shtatzëna dhe fëmijët. Ne i këshillojmë qytetarët që t’i evitojnë daljet e panevojshme në periudhat kur janë temperaturat e larta”, ka thënë Albana Morina, specialiste e Mjekësisë Familjare.
Morina thotë se ekspozimi në diell gjatë këtyre ditëve mund ta përkeqësojë gjendjen shëndetësore, veçanërisht tek ata me probleme kronike shëndetësore.
“Zakonisht mund të vijë me marramendje, kokëdhimbje, lodhje, plogështi, shpeshherë edhe vjellje. Normalisht, nëse nuk kompensohen sasi të ujit të konsiderueshme, por edhe për shkak të patologjive të tjera, atëherë është më problem për ta tejkaluar këtë situatë. Mund të kenë komplikime nëse pacientët nuk mbrohen, mund të vijë deri te dehidrimi, deri te goditja në tru, infarktet, sidomos te personat që kanë probleme kardiovaskulare, personat me diabet”, ka thënë ajo.
Në qendra të mjekësisë familjare në Prishtinë nuk është parë fluks i shtuar i pacientëve, e të dhëna për rastet nuk kanë ofruar as QKUK-ja dhe as Instituti Kombëtar i Shëndetësisë Publike.
Por IKSHPK-ja dha një listë këshillash për qytetarët, përfshirë nevojën për qëndrim në ambiente të freskëta dhe të ajrosura mirë e shmangie të daljes në diell gjatë orëve më të nxehta të ditës.
“Shmangini aktivitetet fizike intensive gjatë ditës. Kujdes i veçantë duhet treguar ndaj grupeve më të ndjeshme si fëmijët, të moshuarit dhe personat me sëmundje kronike. Në rast të shenjave, si marramendje, lodhje e pazakontë, djersitje e shtuar apo humbje e vetëdijes, kërkoni menjëherë ndihmë mjekësore”, thuhet në njoftimin e IKSHPK-së.
Pasojat e temperaturave të larta janë parë edhe në mjedis.
Sipas Institutit Hidrometeorologjik, rrjedhat e lumenjve janë aktualisht nën mesataren e tyre për shkak të mungesës së reshjeve dhe borës gjatë dimrit.
“Edhe pse ka pasur reshje, ato kanë qenë në formë të rrebesheve të shiut dhe lokale, të cilat shpejt janë larguar nga pellgjet. Situatë e njëjtë është në shumicën e lumenjve, por më e rënduar në atë të Drinit të Bardhë”, ka bërë të ditur ky Institut.
Instituti ka paralajmëruar se kjo gjendje mund të përkthehet në thatësirë të theksuar gjatë verës, duke ndikuar në furnizimin me ujë, bujqësi dhe prodhimin e energjisë hidro.
Edhe për javën e ardhshme janë paralajmëruar temperatura të larta, maksimalja e të cilave pritet të shkojë deri në 38 gradë celsius./KOHA/Katror.info
