Ministria e Kulturës, Rinisë dhe Sportit (MKRS) dhe Komiteti Olimpik i Kosovës (KOK) kanë nënshkruar sot një Memorandum Bashkëpunimi për organizimin e Lojërave Mesdhetare “Prishtina 2030”, raporton Ekonomia Online.
Zëvendësministrja në detyrë, Daulina Osmani, tha se marrëveshja parasheh krijimin e një strukture të përkohshme organizative deri në hyrjen në fuqi të ligjit për Lojërat Mesdhetare, si dhe një financim prej 2.6 milionë euro.
“Ky është një hap tjetër i rëndësishëm drejt organizimit të Lojërave Mesdhetare 2030. Përkundër sfidave të krijuara nga dërgimi i ligjit në Gjykatën Kushtetuese, kemi gjetur rrugë alternative duke respektuar kornizën ligjore. Me këtë memorandum, ne dakordohemi me KOK-un për themelimin e një strukture tranzitore që do të funksionojë deri në miratimin e ligjit,” deklaroi Osmani, duke shtuar se ky projekt është një angazhim strategjik për avancimin e qytetarëve dhe forcimin e bashkëpunimit rajonal.
Mundesh me e lexu edhe…
Ndërkaq, kryetari i KOK-ut, Ismet Krasniqi, e cilësoi marrëveshjen si një hap kyç në përgatitjet për “Prishtina 2030” dhe bëri të ditur se javën e ardhshme do të mbahet takimi i parë i bordit për diskutimin e organizimeve të ardhshme.
“Kemi siguruar financimin dhe themelimin e strukturës organizative për Lojërat Mesdhetare. Së shpejti, me partnerët tanë, do të nisë puna konkrete për këtë ngjarje madhore,” tha Krasniqi.
Lojërat Mesdhetare “Prishtina 2030” pritet të jenë një nga ngjarjet sportive më të mëdha të organizuara ndonjëherë në Kosovë, me synim promovimin e sportit dhe bashkëpunimit ndërkombëtar./Katror.info
