Dashnia për vendin shfaqet në forma të ndryshme. E për disa studentë të gazetarisë në Universitetin e Prishtinës, një nga format më të prekshme, është duke u kujdesur për mjedisin. Pas një hulumtimi që kanë bërë për gjendjen mjedisore në të gjitha rajonet e Kosovës, ata kanë nisur fushatën vetëdijesuese “Ndrysho për Kosovën“.
Të vetëdijshëm se në kohën e ndryshimeve klimatike, ambienti paraqet një nga sfidat kryesore të kohërave moderne, këta studentë po përpiqen që të paktën me fushatën në rrjetet sociale të ngrisin vetëdijen te të gjitha grupmoshat për ruajtjen e ambientit.
Për Teuta Berishën, asistente në departamentin e Gazetarisë në lëndën Marrëdhënie me Publike, ruajtja e ambientit është akt patriotik për shtetin.
Mundesh me e lexu edhe…
“’Ndrysho për Kosovën’ është faktikisht një thirrje për të gjithë qytetarët e Republikës së Kosovës, për me mbajt pastër ambientin, mjedisin, por jo edhe vetëm me mbajt pastër, por edhe me qenë në njëfarë forme mbikëqyrës të të tjerëve, kur bëjmë veprime të cilat bien ndesh me mbrojtjen e mjedisit. Po ashtu, përmes kësaj kampanje kemi synuar me ngritë vetëdijen e qytetarëve që me pa mbrojtjen e mjedisit, jo vetëm si frikë nga gjobitja, por me pa edhe si akt patriotik, që e bëjmë për shtetin tonë”, thotë ajo.
Në këtë kampanjë janë të përfshirë 15 studentë të vitit të parë master në gazetari të cilët e ndjekin lëndën Marrëdhënie me Publikun. Secili nga ta kontribuon në forma të ndryshme për arritjen e qëllimit përmes kësaj fushate, siç edhe shpjegon Florida Morina.
“Ne për këtë kampanjë kemi bërë hulumtime prej shtatë rajoneve prej të cilave vijmë, dhe fatmirësisht të gjithë studentët kemi qenë prej rajoneve të ndryshme. Kështu që prej shtatë rajoneve të Kosovë, ne kemi bërë hulumtime për gjendjen mjedisore, në të gjitha komunat të cilat i përfshijnë këto rajone edhe kemi ardhur në përfundim që tema më shqetësuese edhe më e rëndësishme për të cilën ne mundemi me bo një fushatë vetëdijesuese është mbrojtja për mjedisin edhe vetëdijesimi, ndërgjegjësimi i qytetarëve edhe me ruajt ambientin e Kosovës”, thotë Florida.
Ndërsa Elona Krasniqi, për të përçuar sa më gjerë mesazhin dhe për të arritur rezultatin e dëshiruar targetoi audienca të ndryshme të shoqërisë sonë.
“Kryesisht në pjesën në të cilën jam marrë unë në kampanjë kanë qenë rrjetet sociale. E kemi targetu audiencën, në tri rrjete sociale, jemi mundu që me ju përshtat moshave të ndryshme, kemi targetu moshën më madhore ose më të rritur në Facebook, në Instagram dhe TikTok i kemi synu të rinjtë dhe ashtu e kemi nda edhe përmbajtjen që e kemi kriju për fushatën. Kryesisht në Facebook, Instagram kemi postu fotot, video, pamje të Kosovës me gjelbërim dhe me mbeturina të cilat janë bërë prej qytetarëve të Kosovës, për të gjitha rajonet e Kosovës. Kurse në TikTok jemi duke bërë edhe përmbajtje tjera, video të shkurtra, 15 sekondëshe të cilat më së shumti targetojnë audiencën e të rinjve në TikTok, dhe jemi duke u mundu me paraqit dy anët e Kosovës, një të pastër dhe një me mbeturina të cilat janë hedhë dhe është dëmtu ambienti prej qytetarëve të Kosovës”, shprehet Elona.
Edhe Ganimete Ademi thotë se ruajtja e mjedisit është njëra nga format e shfaqjes së dashurisë ndaj atdheut.
“Këtë fushatë e kam marrë goxha ngat zemrës, ndoshta për shkak të moshës, se kam një diferencë me kolegët tjerë studentë. Hulumtimi ka qenë me pa vende ku ka mbeturina, edhe në ujëra po edhe në tokë. Kështu që atë pjesë e kam pasë, kam lëvizë me makinë nëpër qytete nëpër vende të ndryshme të Kosovës, kam hulumtuar, kam kontaktuar njerëz, edhe kam bërë fotografi, kam bërë video, kanë dalë jashtëzakonisht shumë të bukura. Kosova e ka një bukuri përrallore, të jashtëzakonshme, por fakti që dimë me shëmtu me duart e tona, është e dukshme, dhe kjo na ka shqetësu. Por, po shpresojmë që një nismë si kjo, një iniciativë si kjo, ka me shërby në vetëdijesimin e qytetarëve. Duhen nisma si kjo, sepse dashuria ndaj vendit nuk është vetëm me penë, nuk është vetëm me pushkë, por është edhe me veprime, edhe një letër ose një pengesë nëse e largon prej rrugës është dashuri ndaj vendit edhe ndaj atdheut”, thotë Ganimetja.
Ndërsa, Arlinda Hajdaraj shprehet se për këtë fushatë kanë zbatuar me shumë dëshirë njohuritë dhe aftësitë e tyre.
“Unë jam marrë me pjesën e dizajneve të fotografive, të cilat janë postu në rrjete sociale, si Instagram, Facebook dhe TikTok. Këtë punë e kam bërë me shumë qejf dhe kënaqësi, për faktin që krahas gazetarisë merrem edhe me fushën e dizajnit grafik, kështu që njohuritë dhe aftësitë e mia në këtë fushë i kam implementu edhe në kampanjën që e kemi realizu”, shprehet Arlinda.
Në kuadër të kësaj kampanje përçohen pesë mesazhe siç janë: për Kosovën pa mbeturina, për Kosovën e gjelbër, për Kosovën pa smog, për Kosovën me burime uji dhe për Kosovën fisnike. Të gjitha këto i janë kushtuar tokës, ajrit, ujit, por edhe sjelljes së individëve në raport me mjedisin.
“Duke e parë njëfarë rreziku që po i bëhet vendit tonë për shkak të mungesës së mbrojtjes së mjedisit dhe për shkak të mungesës së vetëdijes së qytetarëve, ne e kemi pa shumë të rëndësishme që me nis këtë fushatë me këto pesë mesazhe. Për shkak që sa i përket ndotjes së ujit, ka shumë njerëz të pandërgjegjshëm të cilët hedhin mbeturina në shtratin e lumit, dhe të tjerë, kompani të ndryshme të cilët heqin zhavorrin, dhe kjo ka bërë që në periudha të caktuara, para disa kohe të kemi vërshime. Jemi edhe vetë dëshmitarë, i kemi pa se çfarë ka ndodhur prej vërshimeve. Po ashtu shohim gjatë periudhës sidomos të dimrit, shohim një ndotje tepër enorme të ajrit, për shkak të lëndëve djegëse, për shkak të termocentraleve, por diçka që ne si individë, mundemi vetë me bo për me ruajt mjedisin është me përdor më shumë ndoshta transportin publik, me përdor më shumë lëvizjen në këmbë apo biçikleta, e jo me vetura private. Sa i përket mbeturinave studentët kanë hulumtuar gjendjen mjedisore, dhe kanë pa shumë raste ku komuna, kompanitë përkatëse, por edhe grupe joformale, organizata jo qeveritare që merren me mbrojtjen e mjedisit, kanë pastru disa herë deponitë e mbeturinave, dhe për një kohë të shkurtë ndoshta pas një javë prapë ato deponi janë mbushur me mbeturina, sepse qytetarët dhe individë të caktuar janë mësu me shku me hedh mbeturina në po ato vende, edhe pse e dinë që nuk është e lejuar. Një arsye tjetër është që me i nxitë qytetarët me reflektu në raport me atë se çfarë ata bëjnë, sepse deponitë e mëdha të mbeturinave, shkaktojnë rrezikun për përhapjen e sëmundjeve të ndryshme për shkak se nuk ka klasifikim të tyre, shkaktojnë rrezikun e përhapjes më të madhe të qenve endacak, ose të ndonjë epidemie”, shton Teuta.
Këta studentë të nivelit master të gazetarisë shprehen të gatshëm për të vazhduar me fushatën edhe pas përfundimit të studimeve, ndërsa shpresojnë që nisma e tyre të sjellë ndryshime në sjelljen e shoqërisë me mjedisin tonë.
Ndërsa Teuta bën thirrje që të jemi më miqësorë ndaj mjedisit.
“Siç është edhe vetë mesazhi i fushatës sonë ‘Ndrysho për Kosovën’, i vetmi mesazh që kam për qytetarët e Republikës së Kosovës, për të gjithë ata prej fëmijëve deri tek ata më të moshuar është me ndryshu për Kosovë, edhe me qenë më miqësor me mjedisin”, theksoi ajo.
Kosova ka vende të bukura dhe çdo veprim i vogël që bëjmë për të ruajtur mjedisin dhe reduktuar ndotjen, rezulton në një të ardhme më të ndritshme për brezat e ardhshëm. /Katror.info
Edicionin #51 të plotë e gjeni KËTU 🙂
Përgatiti:
