Shumë turistë udhëtojnë në veri të Evropës në dhjetor për të përjetuar udhëtime emocionuese me sajë, për të admiruar dritat polare dhe për të takuar Babadimrin në “mjedisin e tij natyror”, shkruan putnikofer.hr.
Megjithatë, ndoshta përvoja më e pazakontë që mund të përjetoni këtu është të kaloni natën në dhomat e akullit! “Icehotel” në Jukkasjärvi të Suedisë është pikërisht vendi i duhur – një hotel i ndërtuar nga akulli dhe bora. Javën e kaluar u hap për publikun për herë të 34-të dhe në të mund të flihet.
Me peisazhin e tij të bukur dhe afërsinë me qytetin e Kiruna, Jukkasjärvi ka qenë gjithmonë një destinacion i preferuar veror në Suedi. Sidoqoftë, në vitin 1989, një vendas vendosi të përmirësojë përvojën e vendit të tij dhe të krijojë një atraksion të ri dimëror – hoteli i parë në botë me akull. Ai e gjeti frymëzimin për këtë ide të pazakontë një mbrëmje kur një grup aventurierësh të pajisur me lëkurë dreri dhe çanta gjumi e pyetën nëse mund ta kalonin natën brenda punishtes së tij. Ai e kuptoi shpejt se hapja e një hoteli në akull do të ishte një ide vërtet e jashtëzakonshme.
Mundesh me e lexu edhe…
I bërë nga akulli i lumit Torne, hoteli i akullit kalon çdo vit një lloj “rimishërimi” dhe shndërrohet në forma krejtësisht të reja që të lënë pa frymë. Në këtë vend të jashtëzakonshëm, disa dhjetëra artistë nga vende të ndryshme mblidhen për të sjellë në jetë modelet e tyre inovative.
Temperaturat e dhomës së hotelit mbahen midis -5 dhe -8°C për të siguruar që akulli të mbetet i paprekur gjatë gjithë sezonit të dimrit. Pavarësisht të ftohtit, të gjithë të ftuarit flenë në shtretër akulli, por për t’i mbajtur ata të rehatshëm, ofrohen dyshekë të trashë, çanta termike gjumi dhe batanije të ngrohta me lëkurë të drerit. Çdo mëngjes në hollin e hotelit ata priten me një filxhan çaj të nxehtë, më pas një vizitë falas në sauna për t’u ngrohur.
Në “Icehotel” mund të shijoni pijen në barin e akullit, të admironi artin e ngrirë dhe të eksploroni shkretëtirën e paprekur të Laplandit suedez. Sipas informacioneve nga faqja zyrtare, hoteli ofron edhe një kinema dhe një sallë për ceremoni të ndryshme, të dyja të ndërtuara tërësisht nga akulli. Udhëtimi në “Icehotel” është i lehtë: ka trena dhe aeroplanë të rregullt nga Stokholmi në Kiruna, dhe nga Kiruna në Jukkasjärvi është një udhëtim i shkurtër me autobus prej 30 deri në 50 minuta, në varësi të kushteve të motit. /Katror.info
Përgatiti:
