Nesër finalja e madhe e Eurovision 2025, “Zjerm” performon e fundit

Një natë magjike pritet nesërmbrëma, teksa 26 shtete do të ngjiten në skenën madhështore të Eurovision 2025 për të garuar për trofeun e artë të muzikës europiane.

Shqipëria do të jetë ndër momentet më emocionuese të mbrëmjes, duke performuar e fundit në renditje — në vendin e 26-të — një pozicion shpesh cilësuar fatlum, që është njëkohësisht edhe kodi i votimit për publikun.

Përfaqësuar nga Shkodra Elektronike me këngën “Zjerm”, Shqipëria siguroi vendin në finale pas një performancë shpërthyese në gjysmëfinalen e parë, të mbajtur në Bazel të Zvicrës.

“Zjerm” ka tërhequr vëmendje të madhe me përzierjen unike të tingujve elektronikë dhe motiveve të folklorit shqiptar, duke krijuar një atmosferë moderne, emocionale dhe autentike që ka rezonuar fuqishëm me publikun europian.

Finalja e Eurovision 2025 do të transmetohet drejtpërdrejt në RTSH dhe RTK, duke sjellë në çdo shtëpi emocionin, energjinë dhe shpresën për një rezultat historik për Shqipërinë.

Votoni për Shqipërinë – votoni numrin 26!

Të gjithë shqiptarët që jetojnë jashtë vendit mund të votojnë për këngën “Zjerm” duke dërguar një SMS në numrin 54345, me kodin përkatës të këngës shqiptare. Nga territori i Shqipërisë nuk është e mundur të votohet për përfaqësuesen shqiptare. Votimi mund të bëhet përmes telefonit, SMS, ose online me pagesë në faqen zyrtare: esc.vote

Metodat e votimit sipas vendeve

Shqipëria: Voto me SMS duke dërguar një mesazh në 54345 me kodin e këngës (01 deri në 15 në gjysmëfinale, 01 deri në 26 në finale). Çmimi për SMS: 120 ALL.

Italia, Lituania, Malta, Luksemburgu, Ukraina, Suedia, Zvicra, Australia etj.: Voto vetëm online në esc.vote.

Mbretëria e Bashkuar, Austria, Kroacia, Spanja, Serbia, Franca, Danimarka etj.: Voto përmes telefonit, SMS-së ose online në esc.vote.

Renditja e këngëve në natën finale:

1. Norvegjia
2. Luksemburgu
3. Estonia
4. Izraeli
5. Lituania
6. Spanja
7. Ukraina
8. Britania e Madhe
9. Austria
10. Islanda
11. Letonia
12. Holanda
13. Finlanda
14. Italia
15. Polonia
16. Gjermania
17. Greqia
18. Armenia
19. Zvicra
20. Malta
21. Portugalia
22. Danimarka
23. Suedia
24. Franca
25. San Marino
26. Shqipëria

/RTSH./Katror.info