Në periferi të Lipjanit, familja e Hajriz Rashitit ka kthyer shtëpinë e tyre prej 320 metrash katrorë në një shembull të vetëqëndrueshmërisë energjetike, falë instalimit të paneleve diellore.
Me një sistem diellor të vendosur në fillim të këtij viti, ata nuk kanë më nevojë për energji të furnizuar nga rrjeti i shpërndarjes elektrike.
Përfitimet financiare janë të dukshme, nga 70 euro që kishin paguar për energji në maj të vitit 2024, në maj të këtij viti kanë shpenzuar vetëm 3 euro.
Mundesh me e lexu edhe…
“Kjo rrymë tash osht prej paneleve diellore, edhe të gjitha punët tjera kryhen, përgatitja e ushqimit, bojleri apo frigoriferi, dy apo tri, funksionojnë me panele diellore. Do të thotë, nga mëngjesi deri në mbrëmje nuk marrim asnjë kilovat rrymë,” thotë Hajriz Rashiti.
Sistemi i instaluar i mundëson familjes Rashiti jo vetëm të përdorë energjinë e prodhuar gjatë ditës, por edhe ta kthejë në rrjetin elektrik të KEDS-it, për përdorim gjatë natës, duke siguruar një qarkullim të qëndrueshëm energjetik.
“Tash osht ora 13:09 minuta, i ka prodhu deri tash prej mëngjesit, 29 kilovatë, a për momentin osht t’u i prodhu 7 kilovatë”. shprehet tutje Rashiti.
Ky rast është vetëm një nga shembujt e rritjes së interesimit për burime të ripërtëritshme. Instalimi i kushtoi familjes 7,500 euro, ndërsa ajo është përfituese e skemës së mbështetjes prej 1,500 eurosh nga Ministria e Ekonomisë. Megjithatë, familja thotë se këto mjete ende nuk i ka pranuar.
Sipas Ministrisë së Ekonomisë, gjatë vitit të kaluar janë mbështetur 283 nga 426 aplikime familjare, me një shumë mbi 470,000 euro. Ndërkohë, në vitin 2024 janë lëshuar 671 autorizime për panele solare për konsum familjar dhe biznese, një rritje e jashtëzakonshme krahasuar me vetëm 23 autorizime në vitin 2023.
Ndërsa interesi për investim në energji diellore po rritet, sidomos mes institucioneve dhe kompanive, Hajriz Rashiti apelon që qytetarët të ndjekin këtë shembull dhe që shteti të vazhdojë të ofrojë mbështetje financiare për të nxitur këtë tranzicion të gjelbër./Katror.info.
Storia është realizuar nga Radio Evropa e Lirë, të njëjtën të plotë mund ta gjeni në këtë link.
Përgatiti:
