Ministrja në detyrë e Ekonomisë, Artane Rizvanolli, ka njoftuar fillimin e një faze historike të modernizimit në sektorin energjetik të Kosovës, me nisjen e procesit të përmirësimit dhe zgjerimit të kapaciteteve të Termocentralit “Kosova B” – për herë të parë që nga ndërtimi i tij, mbi katër dekada më parë, shkruan Katror.info.
Sipas Rizvanollit, ky investim prej 56.5 milionë euro është tërësisht i financuar nga Korporata Energjetike e Kosovës (KEK), pa marrë kredi apo borxhe. Ajo e cilësoi këtë hap si një moment të rëndësishëm drejt forcimit të sigurisë energjetike dhe përgjegjësisë publike në menaxhimin e resurseve shtetërore.
“Po ndërmerret një hap i rëndësishëm drejt sigurisë energjetike dhe përgjegjësisë publike,” shkroi ministrja në një postim në Facebook.
Mundesh me e lexu edhe…
Modernizimi përfshin jo vetëm rinovimin e njësive ekzistuese të termocentralit, por edhe zgjerimin e kapaciteteve prodhuese, që do të ndikojë drejtpërdrejt në stabilitetin e furnizimit me energji në vend. Vetëm gjatë vitit 2025, pritet që kapaciteti i prodhimit të rritet me 15 megavatë – një përparim i dukshëm për sektorin energjetik të Kosovës.
Ky zhvillim vjen në një kohë kur vendi përballet me sfida të shumta në sektorin e energjisë, duke e bërë këtë investim një hap strategjik në drejtim të qëndrueshmërisë dhe pavarësisë energjetike./Katror.info
