Kur restoranti i Bruno Seratos në Kaliforni u përfshi nga flakët, ai humbi gjithçka – përveç një kryqi të argjendtë që zjarrfikësit e gjetën mes rrënojave. Për Seraton, ky ishte një mesazh hyjnor për të mos u dorëzuar.
“Thashë me vete: ‘Jo, s’është e mundur!’ Ky ishte një shenjë, një shenjë nga Zoti pa asnjë dyshim,” i tha ai CBS News, përcjell Katror.info.
Ky kryq ishte një dhuratë nga vetë Papa Françesku, të cilin Serato e ka takuar katër herë. Herën e fundit, Papa i tha duke parë një broshurë të punës së tij bamirëse: “Bravo, bravo, continua così” – “Vazhdo kështu.” Për Seraton, kjo ishte një urdhër dhe një bekim njëkohësisht.
Mundesh me e lexu edhe…
Që nga ajo ditë, ai ka rindërtuar restorantin e tij luksoz në Anaheim – “Anaheim White House” – ku mbrëmjeve u shërben të pasurve dhe gjatë ditës ushqen të varfrit. Çdo pjatë që shitet, financon një vakt makaronash për një fëmijë në nevojë.
Puna e tij bamirëse nisi në vitin 2005 me krijimin e organizatës Caterina’s Club, e cila sot shpërndan mbi 5,000 vakte në ditë për fëmijët në Orange dhe LA County. Për këtë, Serato është shpallur “Hero i CNN” në vitin 2011 dhe ka marrë çmimin Ellis Island Medal of Honor.
Në tetor të këtij viti, organizata e tij feston 20-vjetorin – një moment për të reflektuar mbi gjithçka është arritur.
“Duhet të vazhdoj të bëj atë që bëj – nëse jo, ai (Papa) do të zbresë nga lart!” tha ai me humor./Katror.info
