Me 1 tetor, është lansuar portali më i ri medial i quajtur Home Abroad: Journal for Diaspora and Expats, i njohur me akronimin HAJDE.
Themeluese e kësaj medie online, është Majlinda Aliu, gazetare me përvojë të gjerë në Kosovë, kryesisht në televizionin publik Radio Televizioni i Kosovës, si dhe me publikime në media ndërkombëtare. Tash e 4 vite ajo jeton në Vjenë të Austrisë, ku është duke punuar në temën e saj të doktoratës në fushën e qeverisjes së mediave, në Universitetin e Vjenës.
Ajo tregon për Katror, sesi erdhi tek kjo ide.
Mundesh me e lexu edhe…
Gjatë studimeve të magjistraturës në Londër, pjesë të korrikulës kemi pasur lëndën e inovacionit në media. Dhe atë kohë, pata zhvilluar një plan biznesi për një media me fokus në Ballkanin Perëndimor. Pastaj u ktheva në Kosovë, dhe nuk iu ktheva më asaj ideje.
Por, përvoja e saj në Vjenë, i hapi horizonte të reja, dhe ideja e nisur në Londër, u jetësua në Vjenë, por në një formë të adaptuar.
Që kur kam ardhur në Vjenë për studime, e kam parë sa e nevojshme është që të ketë media të cilat flasin për tema lokale, në gjuhë të emigrantëve, dhe nga përspektiva e tyre. Dhe duke qenë se Austria është një nga vendet më të populluara me emigracion nga vendet e Ballkanit, e kam rimenduar modelin që kisha zhvilluar në Londër.
Ka disa platforma mediale që mbulojnë komunitete të caktuara gjuhë lokale, apo në gjuhët amëtare të komuniteteve, por nuk ka një platformë ku vendosë në një vend, shumë gjuhë dhe shumë komunitete. E veçantë e HAJDE është se do të ofrojë lajme mbi zhvillimet në Austri dhe rreth komuniteteve që jetojnë atje në gjuhë të Ballkanit. Kemi filluar me shqip, anglisht dhe turqisht, dhe planet janë të zgjerohemi edhe në gjuhë dhe komunitete të tjera, që vijnë nga Ballkani. Ideja është inovative, dhe tashmë në procedurë për t’u patentuar.
Ekipi i HAJDE përbëhet nga profesioniste të cilat kanë rezyme të pasur në fushën e gazetarisë, PR-it dhe diplomacisë ndërkombëtare.
Rozafë Rexhepaj, ka mbi 10 vite përvojë në gazetari, në Prishtinë dhe Vjenë, ndërsa është e magjistruar në fushën e komunikimit dhe gazetarisë në Universitetin e Vjenës. Ndërsa Aytan Aliyeva, ka një përvojë të shkëlqyer në diplomaci të jashtme, angazhimin me diasporën dhe partneritetet globale. Aktualisht punon në Ambasadën e Azerbajxhanit në Austri dhe Slloveni, gjersa ndjek edhe programin e doktoraturës në Shkencat Politike në Universitetin e Vjenës.
“Ekipi ynë, ndonëse i vogël, është shumë efikas, dhe vlerësojë jashtëzakonsht kontributin e tyre në këtë iniciativë. Rozafa, është mbështetsja ime kryesore, që nga inicimi i idesë, deri tek lansimi i saj, posaqërisht në realizim të temave. Aytan, na ndihmon në vendosjen e urave të komunikimit me komunitetin turk në Austri, si dhe në redaktim dhe përkthim të materialeve në gjuhë turke. Gjithashtu, dua të përmend Bleona Halimin, një web-dizajnere e shkëlqyer, e cila ka zhvilluar dhe dizajnuar faqen e HAJDE në një format të pëlqyer nga të gjithë”.
Moto e HAJDE është: ku takohen kulturat, tregimet na bashkojnë. Ndërsa “HAJDE”, është fjalë që përdoret në shumë gjuhë të Ballkanit me të njejtin kuptim, që do të thotë “eja”. Pra, përdorimi si fjalë e vetme simbolizon mikpritjen, ftesën për të ecur tutje, gjersa emri i plotë nga anglishtja do të thotë “shtëpia juaj larg atdheut: një ditar për diasporën dhe emigranët”.
Ky edhe është misioni kryesor i kësaj platforme: të lehtësojë integrimin dhe të promovojë diversitetin për emigrantët, thuhet në përshkrimin e misionit të Hajde. Për të mësuar më shumë rreth tyre, ndiqni faqen: www.hajde.eu.com .
