Grevist Bytyqi, po shkruan historinë e Kosovës duke u bërë paraatleti i parë që merr pjesë në Lojërat Paralimpike, të cilat zhvillohen në Paris nga 28 gusht deri më 8 shtator. Ai bart flamurin kosovar duke shpërfaqur jo vetëm një arritje të madhe sportive për Kosovën, por edhe një dëshmi të fuqisë njerëzore për të kapërcyer çdo pengesë.
“Ne do të përfaqësohemi me paraatletin tonë Grevist Bytyqi, që do të garojë më datën 31 gusht në disiplinën e atletikës në vrapim dhe po uroj që gjithçka do të shkojë mirë dhe të na sjellë rezultate, por mbi të gjitha të jetë me me kriteret dhe me standardat fair-play dhe ajo është medalja më e mirë prezantimi që do ta bartë mbi supe sportisti, paraatleti ynë, Grevist Bytyqi.“
Përfaqësimi i Kosovës në Lojërat Paralimpike nuk ka qenë proces i lehtë. Është një grua që ka punuar vazhdimisht për të drejtat e personave me aftësi të kufizuara dhe gjithëpërfshirjen. Andaj, Katror Media këtë edicion të Aktivizmit Qytetar ia kushton Njomza Eminit, presidentes së Komitetit Paralimpik.
Mundesh me e lexu edhe…
“Dyert që sot janë hapur për Kosovën në lojërat paralimpike nuk u hapën lehtë. Ato u hapën falë sakrificës, pasionit dhe përkushtimit të paepur të çdo individi që ka qenë pjesë e kësaj rruge. Duhet të kesh një zemër të madhe, që të jesh pranë atyre që kanë nevojë dhe që kanë talent dhe që mundësitë duhet t’i krijosh për talentin që e kanë, por edhe për pasionin që të merren me sport. Unë motivin e kam nga prindërit e mi, jam rrit në frymën e tyre që t’i ndihmoj, por edhe të jemi në ndihmë aty ku mundemi ne, si qytetarë në radhë të parë, por edhe si përfaqësues publikë, kudo që jemi në pozita të ngrisim zërin për të drejtat e tyre për të qenë ata të barabartë,” shprehet Emini.
Kosova u bë anëtare e Komitetit Paralimpik Ndërkombëtar (IPC) në vitin e kaluar, gati nëntë vjet pas pranimit në Komitetin Olimpik Ndërkombëtar (IOC).
Kosova tashmë është paraqitur në tri edicione të Lojërave Olimpike, por ka munguar në Lojërat Paralimpike në “Rio 2016” dhe “Tokio 2020” për shkak që nuk ishte anëtare e IPC-së. Lojërat Paralimpike, janë ngjarje madhore multi sportive për sportistët me aftësi të kufizuara dhe zakonisht mbahet pak javë pas Lojërave Olimpike. Grevist Bytyqi debuton më 31 gusht në Paris 2024.
“Sot është një vit që do të mbahet mend për një kohë të gjatë në historinë tonë kombëtare. Sot, për herë të parë, Kosova po nis që të ngrejë flamurin e saj në skenën më të madhe sportive botërore: Lojërat Paralimpike. Ky është një moment që na mbush me krenari të pamasë dhe me emocione të thella, sepse jemi këtu falë përkushtimit dhe kontributit të secilit prej jush që ka besuar dhe ka punuar për këtë lëvizje të shenjtë“, shton ajo.
Prezantimi i Kosovës me paratletin Grevist Bytyqi, jep shpresë për secilin person me aftësi të kufizuar e që sportin e ka pasion. Jashtë pjesëmarrjes në lojëra paralimpike, apo gara të ndryshme vendore e ndërkombëtare, Njomza Emini thotë se sporti është një nga hapat kryesorë që kontribuon në gjithëpërfshirje. Për ta arritur këtë thotë se merret çdo ditë.
“Përmes sportit personat me aftësi të kufizuar integrohen. Sporti është mjeti kryesor edhe në zbulimin e talenteve, por edhe në edukimin fizik të tyre. Ne kemi publiku edhe një libër gjithëpërfshirja në edukimin fizik me autorët Ahmet Mahmutaj dhe Enver Ulaj, ku përmes këtij libri dëshirojmë që promovojmë dhe të sensibilizojmë, por edhe të përdoret në shkollat fillore dhe të mesme ku në lëndën e edukatës fizike, fëmijët me aftësi të kufizuar, të rinjtë me aftësi të kufizuar mos të lihen anash dhe t’i inkuadrohen, tashmë edhe në programin që është akredituar nga Ministria e Arsimit, Shkencës dhe Teknologjisë. Ne, si Komitet Paralimpik i Kosovës jemi duke i zhvillu trajnimet në të gjitha shkollat të ciklit të ulët dhe të mesëm t’i trajnojmë mësimdhënësit në mënyrë që t’i demonstrojnë edhe sportet paralimpike me librin që e kemi botu. Ne dëshirojmë që mos të mbetet vetëm në teori, por edhe në praktikë sepse ka shumë mësimdhënës që e kanë vullnetin, por nuk e kanë metodologjinë apo edhe nuk dinë se si t’iu qasen fëmijëve me aftësi të kufizuara“, thotë Njomëza.
Njomza si në të kaluarën edhe sot, synon që gjithmonë të ngre zërin për të gjithë ata që përballen me sfida fizike dhe të eliminojë paragjykimet dhe ndryshimet e perceptimit të shoqërisë mbi personat me aftësi të kufizuara. Këtu përmend pjesëmarrjen në Lojërat Paralimpike si sukses që arrihet me punë dhe përkushtim.
“Sot është Grevisti, por, nesër do të jenë shumë të tjerë që do të mbajnë lart flamurin e Kosovës. Ky moment është fryt i përpjekjeve tona të përbashkëta, i betejave të fituara dhe mbi të gjitha i besimit në vlerat që përfaqësojmë si Lëvizje Paralimpike. Në këto momente, më shumë sesa për ne që jemi këtu sot ndihemi krenarë që po u lëmë pas një trashëgimi të pasur gjeneratave që do të vijnë. Një trashëgimi e cila është ndërtuar mbi bazat e solidaritetit, barazisë dhe të drejtës për secilin që të shpreh talentin e tij, pa marrë parasysh sfidat fizike me të cilat përballet“, thekson Njomëza.
Në Lojërat Paralimpike Paris 2024 do të marrin pjesë 184 shtete me mbi 4.400 atletë. Kosova, që merr pjesë për herë të parë shpresat i ka te Grevisti që udhëtoi për Paris përplot optimizëm. /Katror.info
Edicionin #59 të plotë e gjeni KËTU🙂
Përgatiti:
