Organizata Joqeveritare OMCULTI është afër finalizimit të projektit “100 libra audio për të verbërit në Kosovë”.
Projekti “100 libra audio për të verbrit në Kosovë”, do të ofrojë 100 libra audio për personat e verbër dhe me shikim të dobësuar në Kosovë, nëpërmjet partnerëve të Projektit: “Biblioteka Kombëtare e Kosovës”, “Biblioteka e të Verbërve të Kosovës”, dhe “Komiteti i Grave të Verbra të Kosovës”.
Omculti të gjitha librat e incizuara do t’ua dorëzojë organizatave partnere për t’iu krijuar qasje të lehtë dhe të lirë të gjithë anëtarëve të këtyre organizatave. Qëllimi është të ofrojmë qasje të barabartë në literaturë dhe burime arsimore për komunitetin e verbër dhe personat me shikim të dëmtuar, duke promovuar gjithëpërfshirjen dhe fuqizimin.
Drejtoresha e organizatës joqeveritare ‘Omculti’, Qëndresa Loki, ka thënë për Katror Media se qëllimi i organizatës është përfundimi sa më i shpejtë i 100 librave, dhe ofrimi i qasjes për të gjithë personat e verbër në Kosovë.
“Aktivitet e projektit po realizohet më shpejt se që ishin paraparë dhe ne në ndërkohë i kemi vënë synim vetes që ta tejkalojmë numrin 100 libra audio. Për këtë u bëjmë thirrje të gjithë personave që dëshirojnë vullnetarisht të ofrojnë zërin e tyre duke lexuar ndonjë libër për këtë komunitet, të na lajmërohen”, ka thënë Loki, duke shtuar se me këtë do të provojmë që t’i sjellim të paktën 110 libra audio për të verbrit.
Projekti përfshin, po ashtu edhe të gjitha gjuhët e komuniteteve në Kosovë. Menaxheri i këtij projekti, Xhemajl Avdyli ka thënë për Katror Media se ky projekt fillimisht nuk i ka pasur të përfshira gjuhët e komuniteteve, mirëpo gjatë fazës së zhvillimit kemi vendosur që t’i përfshijmë të paktën edhe dhjetë libra nga gjuhët: serbe, boshnjake, kroate, turke dhe gjuha rome.
“Ne kemi angazhuar rreth 12 narratorë profesionistë (aktorë dhe gazetarë), të cilët kanë bërë një punë të madhe dhe të pandërprerë. Duke parë nevojat e shumta të komunitetit të të verbërve ne jemi në përgatitje të projektit pasues, ku do të fokusohemi që këtij komunitetit të mund t’ia sjellim 1 mijë tituj të tjerë, po që se do të arrijmë të gjejmë donatorë të mjaftueshëm”, ka shtuar Avdyli.
Komuniteti i të verbërve dhe i personave me shikim të dobësuar fuqizohet përmes qasjes së barabartë në edukim dhe dije përmes qasjes në audiolibra. OJQ Omculti përveç ekipit të vet, ka kontraktuar studio profesionale për realizimin e këtij projekti, ekspertë të audios si dhe rreth dymbëdhjetë narratorë (aktorë profesionistë).
Për realizimin e këtij projekti, Omculti mbështetet nga Ministria e Kulturës, Rinisë dhe Sporteve e Kosovës, (MKRS), Fondacioni Kosovar për Shoqëri Civile në Kosovë (KCSF), si dhe nga Komuna e Prishtinës.
Si përfundim, projekti për regjistrimin e 100 librave audio për komunitetin e të verbërve në Kosovë është një iniciativë vendimtare që do të ndihmojë në adresimin e nevojave të individëve të verbër dhe atyre me shikim të dëmtuar në vend. Omculti do të sigurojë që librat audio me cilësi të lartë të prodhohen sipas standardeve më të larta. Librat audio do të jenë një burim i vlefshëm për Bibliotekën Kombëtare të Kosovës, Bibliotekën e të Verbërve të Kosovës dhe Komitetin e Grave të Verbra të Kosovës, rrjedhimisht për të gjithë anëtarësinë e këtyre organizatave./Katror.info
Përgatiti:
