Çdokush e ka orën e vet. Kosova e kishte më 17 shkurt 2008, kur vitet e rezistencës paqësore e të armatosur i kurorëzoi me shpalljen e Deklaratës së Pavarësisë.
Pikërisht këtë moment dhe ngjarjet që çuan deri te shpallja e pavarësisë i ka përmbledhur në librin “Ora e Kosovës: Pavarësia dhe Shtetndërtimi” ish presidenti i Kosovës, Fatmir Sejdiu.
“Përpjekja ime ka qenë mes dy zjarresh, të ndalem në pjesën ditore të zhvillimeve apo të ndalem në pjesën kapitale që paraqesin esencën e atij qëllimi. Jam përpjekur të bëjë zgjedhjen e dytë me ndihmesën edhe të asaj që ka qenë e që nuk mund të harrohet,” tha ish presidenti Sejdiu.
Mundesh me e lexu edhe…
Në promovimin e sotëm të librit, presidentja e Kosovës, Vjosa Osmani, e cila dikur kishte punuar me ish-presidentin Sejdiu, tha se ka pasur fat të jetë bashkëpunëtore e një pjese të historisë. Duke folur për titullin e librit, ajo tha se në mitologjinë shqiptare, ora është një qenie e padukshme që sjellë mbarësi dhe fat.
“Secili e ka orën e vet. Ne e kishim më 17 shkurt, andaj me të drejtë ia ka vënë titullin librit, që është një kapitull i ri i vendit tonë. Presidenti Sejdiu paraqitet një kronist i rëndësishëm i vendit, sjell momente autentike që prej fillimit të vendit, shpalljen e Pavarësisë, zhvillimet ndërkombëtare etj. ”, u shpreh Osmani.
Një nga figurat që ndihmoi që procesi i pavarësisë të rridhte më lehtë, ishte shefi i atëhershëm i UNMIK-ut, Joachim Ruecker i cili solli detaje të rëndësishme të asaj kohe.
“Mendoj se njerëzit e Kosovës kanë pasur fat ta kenë një njeri si Fatmir Sjediu më një background politik dhe legal si president në një kohë shumë të rëndësishme, edhe si partner dhe mik i imi. Ai ka qenë njeri me vizion sepse edhe gjatë edhe pas planit të Ahtisaarit kishte një koncept se e dinte se nëse do shpallej Deklarata e Pavarësisë do të mund të anashkalonte UNMIK-un dhe OKB-në,” tha Ruecker duke shtuar se në fund fund të ditës e gjetëm atë interpretim, në kontekstin e deklaratës së pavarësisë me 17 shkurt 2008 se rezoluta 1244 mund të interpretohej në mënyra të ndryshme, tha Rucker.
Ndërkaq, Ibrahim Berisha, redaktor i librit tha se libri ka 435 faqe, duke gërshetuar analizë të dokumenteve elementare, dokumenteve autentike.
“Ka shumë takime që shpalosen për herë të parë, me mbretër, ministra etj. por do ta veçoja kontributin e shquar ndërkombëtar, pa dyshim diplomati finlandez Marti Ahtisari është kyç i gjetjeve që pasuan shtetin më të ri në Evropë”, u shpreh ai.
Ish-presidenti i Shqipërisë, Bamir Topi tha se kjo vepër nuk është thjeshtë një botim.
“E shoh se është një vepër shkencore që legjitimon mikun, qytetarin, politikanin dhe pjesëmarrësin e një etape të jashtëzakonshme për shqiptarët. Gjatë një vizitë të bërë në Kosovë tri javë para pavarësisë, interes të madh kishte nga gazetarët. Nuk iu shpëtova një pyetje ‘provokative’. Një nga gazetarët më beri pyetjen, ‘me këtë atmosferë mos jeni ju lajmëtar i Pavarësisë’. I thashë jam i ftuar i presidentit Sejdiu”, deklaroi ai.
Vetë autori i librit, ish-presidenti Fatmir Sejdiu, tha se do përmend një fjali të ish shefit të UNMIK-ut, Joachim Ruecker, i cili kishte nxjerr një libër, edhe pse ishim në dy drejtime kishim një qëllim, Kosovën e lirë dhe sovrane.
Ai kujton momentet të rëndësishme të disa ditëve para pavarësisë siç ishte takimi me Papa Benediktin 16.
“Papa Benedikti 16 ma dhuroi një laps dhe më tha merre për të nënshkruar vendimet tuaja. E ruaj edhe sot me xhelozi atë laps”.
Ish Presidenti Sejdiu thotë se për njohje tjera ndërkombëtare dhe anëtarësimin e Kosovës në organizata ndërkombëtare Kosovës i duhen miqtë.
“Besoj me mbështetjen e miqve tonë, me njerëzit e Kosovës do të lëvizim edhe në pranimin e saj përtej 117 shteteve, por edhe në pranimin e saj në institucionet ndërkombëtare. Ajo është rrugë e hapur dhe besoj që edhe gjenerata tjera që janë pas dhe që kanë përgjegjësi si presidentja dhe kryeministri në procese normale do të arrijmë të shtojmë edhe miqtë më shumë edhe bashkëngjitjen e Kosovës në institucione ndërkombëtare që do të jete një evaluim i pozitiv i vlerës që ka vendi”, theksoi Sejdiu.
Libri “Ora e Kosovës: Pavarësia dhe Shtetndërtimi” u promovua në kuadër të shënimit të 16-vjetorit të Pavarësisë së Kosovës./Katror.info
Përgatiti:
