Presidentja e Republikës së Kosovës, Vjosa Osmani, ka pritur sot në takim ambasadorin e Bashkimit Evropian në Kosovë, Aivo Orav, me të cilin ka diskutuar zhvillimet aktuale politike dhe vizitat e nivelit të lartë nga Bashkimi Evropian, shkruan Katror.info.
Gjatë takimit, Presidentja Osmani e informoi ambasadorin Orav për mbajtjen e një takimi konsultativ me liderët e partive politike në vend, i cili është planifikuar të mbahet të enjten. Ky takim synon të thellojë konsultimet ndërmjet institucioneve dhe spektrit politik në funksion të zhvillimeve demokratike dhe proceseve të rëndësishme që po kalon vendi.
Në fokus të diskutimeve ishte edhe vizita e kryesuesit të Këshillit të Bashkimit Evropian, António Costa, i cili pritet të qëndrojë sot në Kosovë. Presidentja Osmani e vlerësoi këtë vizitë si një sinjal të fuqishëm të mbështetjes së vazhdueshme të Bashkimit Evropian për rrugën e integrimit evropian të Kosovës, duke theksuar rëndësinë e angazhimit të përbashkët në këtë drejtim./Katror.info
