Presidentja e Kosovës, Vjosa Osmani, ka zhvilluar takim me drejtorin e Institutit të Krimeve të Kryera Gjatë Luftës në Kosovë, Atdhe Hetemi, dhe ekipin e tij, ku është diskutuar për rëndësinë e ruajtjes së kujtesës historike dhe dokumentimit të krimeve të kryera gjatë luftës në Kosovë.
Osmani vlerësoi punën e institutit, duke e cilësuar atë si “zemrën e kujtesës sonë kombëtare” dhe si një institucion që mban gjallë të vërtetën për periudhën më të dhimbshme të historisë së vendit.
“Drejtësia për fëmijët, gratë dhe të gjitha viktimat e luftës është borxhi ynë më i madh si shtet dhe si shoqëri. Çdo jetë e humbur është kujtesë e dhimbshme se pa mbrojtur të vërtetën, pa drejtësi dhe pa kujtesë – nuk ka paqe të vërtetë,” ka theksuar presidentja Osmani.
Mundesh me e lexu edhe...
Ajo shtoi se Instituti i Krimeve të Kryera Gjatë Luftës nuk është vetëm arkiv, por ndërgjegjja e kombit që dëshmon sakrificën mbi të cilën është ngritur liria e Kosovës.
Presidentja Osmani u bëri thirrje qytetarëve, studiuesve dhe të rinjve që të angazhohen në ruajtjen e kujtesës kolektive.
“Historia nuk harrohet – ajo tregohet dhe mbrohet, me dinjitet dhe me të vërtetën si themel,” tha ajo./Katror.info
