Presidentja e Republikës së Kosovës, Vjosa Osmani, ka theksuar rëndësinë e pjesëmarrjes së Kosovës në Samitin e Komunitetit Politik Evropian, i cili nisi sot punimet në Tiranë me pjesëmarrjen e liderëve të 47 vendeve evropiane.
Në një reagim në rrjetet sociale, Osmani tha se ky është samiti i gjashtë ku Kosova merr pjesë, dhe se prania e saj në këtë forum është dëshmi e qartë se zëri i Kosovës është jo vetëm i pranishëm, por edhe i domosdoshëm dhe kontribues në diskutimet për sfidat dhe të ardhmen e përbashkët të Evropës.
“Sot në Tiranë filloi Samiti i liderëve të Komunitetit Politik Evropian. Pjesëmarrja jonë e gjashtë në këtë samit është dëshmi se zëri i Kosovës është i pranishëm, i domosdoshëm dhe kontribues në platformat ku diskutohen sfidat e përbashkëta dhe vendoset për të ardhmen e kontinentit tonë,” theksoi Osmani.
Mundesh me e lexu edhe…
Përmes pjesëmarrjes aktive në këtë samit, Kosova vazhdon të forcojë pozicionin e saj në arenën ndërkombëtare dhe të jetë pjesë e dialogut strategjik evropian për paqe, siguri dhe bashkëpunim.
Samiti në Tiranë vjen në një moment të rëndësishëm për Evropën, ku sfidat gjeopolitike, siguria dhe integrimi janë në qendër të diskutimeve. Pjesëmarrja e Kosovës përforcon mesazhin se vendi është i përkushtuar për të qenë pjesë aktive e së ardhmes evropiane./Katror.info
