Presidentja e Kosovës, Vjosa Osmani, ka përsëritur kërkesën për heqjen e masave të vendosura nga Bashkimi Evropian ndaj Kosovës, duke theksuar se ky është një hap i domosdoshëm për të rikthyer kredibilitetin e BE-së në procesin e dialogut me Serbinë, shkruan Katror.info.
Deklarata e Presidentes Osmani u bë para fillimit të Samitit të Komitetit Politik Evropian, i cili po mbahet në Tiranë, ku Kosova merr pjesë së bashku me liderët e vendeve të rajonit dhe të BE-së.
“Sa i përket dialogut Kosovë–Serbi, ne më parë duhet të flasim për heqjen e masave ndaj Kosovës, sepse kjo e dëmton edhe vetë kredibilitetin e BE-së,” u shpreh Osmani. “Kam kërkuar edhe mbrëmë gjatë darkës me liderët e BE-së, do të kërkoj edhe sot, sepse kjo do t’i jepte kredibilitet dialogut. Kosova është gjithnjë e gatshme që të marrë pjesë në këtë proces.”
Mundesh me e lexu edhe…
Presidentja theksoi se Kosova është në përputhje të plotë me politikën e jashtme dhe të sigurisë të BE-së, duke përmendur faktin se vendi ka qëndruar në linjë me vendimet evropiane edhe në situata të ndjeshme ndërkombëtare.
“Kosova është 100% në linjë me vendimet e BE-së sa i përket politikës së jashtme dhe asaj të sigurisë,” nënvizoi Osmani.
Samiti në Tiranë pritet të trajtojë tema të sigurisë, integrimit evropian dhe bashkëpunimit rajonal, ku Kosova do të kërkojë të jetë një partner i barabartë dhe i respektuar në proceset e ardhshme integruese.
