Presidentja e Republikës së Kosovës, Vjosa Osmani, ka deklaruar se tashmë ka uruar kryetarin e Partisë Socialiste, Edi Rama, për fitoren në zgjedhjet parlamentare në Shqipëri, duke theksuar se komunikimi mes dy vendeve është i përditshëm dhe vëllazëror.
“Faktikisht, unë e kam uruar kryeministrin. Kemi biseduar në telefon, e kam uruar edhe dje, e kam uruar edhe sot. Është një fitore e qytetarëve të Republikës së Shqipërisë”, u shpreh Osmani para gazetarëve, shkruan Telegrafi.
Presidentja theksoi se si praktikë institucionale, urimi zyrtar me letër dërgohet në momentin që një kryeministër merr detyrën pas votimit në Parlament. “Zakonisht ne dërgojmë letra në momentin që merret detyra dhe votohen në Parlament, që besoj se do të ndodhë shumë shpejt. Kjo është çështje teknike dhe procedurale”, theksoi ajo.
Mundesh me e lexu edhe…
Duke folur për marrëdhëniet mes Kosovës dhe Shqipërisë, Osmani u shpreh me tone të përzemërta: “Marrëdhëniet mes dy vendeve tona janë më shumë se vëllazërore, janë si marrëdhënie mes dy motrash. Dhe siç e dini, marrëdhëniet mes motrave janë gjithnjë më të mira, më të sinqerta dhe më përkrahëse sesa ato mes vëllezërve.”
Osmani përmendi gjithashtu pritshmëritë për avancimin e Shqipërisë drejt Bashkimit Evropian, duke e quajtur këtë një ogur të mirë për gjithë rajonin.
“Shpresoj shumë që, ashtu siç është paralajmëruar, Shqipëria shumë shpejt të ecë me hapjen e klasterit të tretë në negociatat me BE-në. Ky është një sinjal pozitiv për të gjithë rajonin tonë dhe për të ardhmen evropiane që synojmë të gjithë”, përfundoi Osmani. /Katror.info
Përgatiti:
