Ushqime tradicionale, veshje kombëtare, punime dore, perime të freskëta nga kopshte familjare si dhe produkte të tjera artizanale po ekspozohen në panairin e gruas “Me zemër për Diasporën”, që u hap një ditë më parë në sheshin “Nëna Terezë” në Prishtinë.
Panairi i gruas “Me zemër për Diasporën” ka zgjuar interesimin e qytetarëve por edhe të mërgatës. I frekuentuar nga vizitorë të shumtë, kjo duket si një mundësi e mirë për bashkëpunim që produktet e tyre të shiten edhe përtej kufijve të vendit tonë.
“Jam një artizane që punojmë me materiale të ndryshme por së fundmi kryesisht jemi fokusuar në perla dhe në gurë natyral”, tha Tefta Hajdarhoxha, pjesëmarrëse.
Mundesh me e lexu edhe…
“Po, fakt, se janë më të lira, përdoren më shpesh, mund t’i ndërrojmë, mendoj që kjo është arsyeja. Këto me lëkurë janë bashkëpunim me artistë të ndryshëm që punojnë, edhe këto janë interesant, janë në trend për momentin. Ne kemi disa lloje prej tyre ka disa ngjyra, janë pëlqyer shumë”, shtoi ajo.
“Këto i kam punuar për ekspozitë, këto janë të miat, nuk po shiten, se po ka shumë”, tha Sabrije Hyseni, pjesëmarrëse e panairit.
“Sot kam ekspozuar pite me hitha, pite me djathë, pite me kungull, pite me purri, turshi, ajvar, reçel te kumbullave, e kështu ëmbëlsira”, tha Sadete Selmani.
“Bletë i kemi në fshatin Sharban të komunës së Prishtinës, gjithashtu edhe lavandën. Përveç bletëve kemi edhe rreth dy hektar të mbjella me perime, kemi bostan, pjepër, domate, speca, speca të kuq të ajvarit, tranguj në përgjithësi të gjitha perimet”, tha Kaltrina Rexhepi Hasani, pjesëmarrëse.
Aktiviteti do të vazhdojë edhe sot tërë ditën. Qëllimi i panairit ‘Me zemër për Diasporën’ është promovimi dhe fuqizimi i rolit të gruas në biznes dhe shoqëri. Panairi është organizuar nga Oda Ekonomike e Kosovës./RTK/Katror.info
