Një numër i konsiderueshëm i partive politike në Kosovë kanë konfirmuar pjesëmarrjen në takimin e thirrur nga Presidentja Vjosa Osmani, i cili synon të diskutojë hapat për zhbllokimin e situatës politike në vend, pas dështimit të njëpasnjëshëm për konstituimin e Kuvendit të Kosovës, shkruan Katror.info.
Lëvizja Vetëvendosje ka njoftuar se në këtë takim do të përfaqësohet nga kryetari i saj, Albin Kurti. Deputetja e VV-së, Mimoza Kusari-Lila, tha se qëllimi i takimit është diskutimi për procesin e konstituimit të Kuvendit dhe jo për ndonjë marrëveshje politike.
Nga radhët e Partisë Demokratike të Kosovës (PDK), kryetari Memli Krasniqi e mirëpriti vendimin e Presidentes për të mbajtur takimin, duke e cilësuar si një hap të rëndësishëm drejt zgjidhjes. Krasniqi përsëriti qëndrimin e partisë së tij për ndryshimin e kandidaturës së Vetëvendosjes për kryetar të Kuvendit.
Mundesh me e lexu edhe…
Edhe Aleanca për Ardhmërinë e Kosovës (AAK) ka konfirmuar pjesëmarrjen në takim. Kryetari i saj, Ramush Haradinaj, tha se do të presin qëndrimet e Presidentes dhe do të paraqesin sugjerimet e veta nëse do ta shohin të nevojshme. Ai përmendi edhe faktin që AAK ka dorëzuar një kërkesë në Gjykatën Kushtetuese lidhur me procesin aktual.
Nga radhët e Nismës Socialdemokrate, kryetari Fatmir Limaj deklaroi se ende nuk ka pranuar ftesë zyrtare, por shprehu gatishmërinë për pjesëmarrje dhe theksoi se për çështje nacionale, dialogu është rruga e vetme. “Të gjitha ftesat në funksion të zgjidhjes së situatave politike, i mirëpresim,” tha Limaj.
Deputetja Emilija Rexhepi theksoi rëndësinë e respektimit të institucionit të Presidentes dhe konfirmoi se do të marrë pjesë në takim. Ajo vlerësoi ftesën si të domosdoshme për tejkalimin e situatës së krijuar.
Ndërkohë, partia Guxo, përmes deputetit Faton Peci, bëri të ditur se ende nuk ka marrë ftesë, por theksoi se si subjekt politik i regjistruar në KQZ duhet të përfshihet në këtë proces, pavarësisht se ka garuar në koalicion me Vetëvendosjen.
Ndërkaq nga LDK, deputetja Hykmete Bajrami tha se nëse Lëvizja Vetëvendosje është kundër propozimit të LDK-së, atëherë duhet të marrë hapa konkretë.
“Shpresojmë që partitë politike të jenë të pranishme në takimin e thirrur nga presidentja. Nëse janë kundër propozimit tonë, besoj që janë ata që duhet të lëvizin. Vetëvendosje i ka edhe 13 parti që nuk u ka bërë ofertë si LDK-së”, tha Bajrami.
Konsultimet e thirrura nga Presidentja Osmani vijnë pas dështimit për të 15-tën herë me radhë të konstituimit të Kuvendit, ndërsa palët politike mbajnë qëndrime të kundërta për mënyrën e zgjidhjes së ngërçit, por megjithatë kanë shprehur gatishmëri për t’u ulur në tryezën e diskutimit./Katror.info
