Një hapësirë e re solidariteti dhe fuqizimi për gratë e mbijetuara të dhunës seksuale gjatë luftës është hapur në ambientet e Tartine Deli në Prishtinë, përmes përurimit të “Këndit të Kurajos”.
Ky kënd sjell produkte të punuara me dorë nga vetë gratë e mbijetuara, si simbol i qëndresës, shpresës dhe fuqizimit të tyre, shkruan Katror.info.
Këtë e bëri të ditur ish presidentja Atifete Jahjaga, përmes një postimi në rrjete sociale.
Mundesh me e lexu edhe...
Në këtë ngjarje morën pjesë ish-presidentja e Kosovës, Atifete Jahjaga, Mirlinda Sada – Drejtoreshë e Medica Gjakova, Kadire Tahiraj – Drejtoreshë e Qendrës për Promovimin e të Drejtave të Grave në Drenas, si dhe Vlora Tuzi-Nushi, Drejtoreshë e UN Women në Kosovë, Edi Gusia, Drejtoreshë Ekzekutive e Agjencisë për Barazi Gjinore, dhe mikpritësja e ngjarjes, Adelina Sokoli, pronare e Tartine Deli.
Duke theksuar rëndësinë e kësaj nisme, Jahjaga u shpreh se fuqizimi shpirtëror dhe ekonomik i grave të mbijetuara është një ndër angazhimet e saj jetësore.
”Fuqizimi i tyre shpirtëror dhe ekonomik ka qenë dhe mbetet një nga qëllimet e mia jetësore, andaj çdo iniciativë në ndihmë të të mbijetuarve mua më bën të lumtur, por më e lumtur ndihem kur iniciativat e tilla gjejnë përkrahjen e miqve të mirë siç është znj. Adelina Sokoli dhe stafi i saj i mrekullueshëm, andaj faleminderit nga zemra”, theksoi Jahjaga.
“Pak nga ne për këto gra do të thotë shumë. Një dorë e zgjatur ndaj tyre është një dorë drejt një të ardhme më të mirë, me plagë të mbyllura dhe me beteja të fituara,” u shpreh ajo.
Iniciativa, e cila bashkon sektorin privat me organizatat që punojnë në terren me të mbijetuarat, u vlerësua si një model frymëzues për solidaritetin qytetar dhe përkushtimin ndaj drejtësisë shoqërore.
“Kjo është vetëm një nismë e vogël që do të hapë rrugën për diçka më madhështore,” theksoi Jahjaga.
“Këndi i Kurajos” synon të krijojë mundësi të reja për integrimin dhe përkrahjen e grave që kanë përjetuar dhunën më të rëndë gjatë luftës, duke i vendosur ato në qendër të vëmendjes dhe duke e kthyer dhimbjen e tyre në forcë krijuese. /Katror.info
Përgatiti:
