WhatsApp, aplikacioni më i përdorur për mesazhe në botë, është duke testuar një funksion të ri që pritet të sjellë lehtësi për përdoruesit që duan të shkëputen përkohësisht nga aplikacioni.
Bëhet fjalë për opsionin “Logout”, i cili aktualisht është në fazën eksperimentale dhe po testohet brenda ekipit të zhvillimit.
Ky funksion do të integrohet në cilësimet e llogarisë dhe do të ofrojë dy mënyra për të dalë nga llogaria:
Mundesh me e lexu edhe…
Dalje me fshirje të të dhënave
Ky opsion do të largojë përdoruesin nga llogaria, duke fshirë të gjitha të dhënat dhe cilësimet e aplikacionit. Megjithatë, përdoruesi nuk do të largohet nga grupet në të cilat është pjesë. Praktikisht, ky veprim është i njëjtë me çinstalimin e aplikacionit, por pa pasur nevojë të shkarkoni WhatsApp-in përsëri.
Dalje pa fshirje të të dhënave
Në këtë rast, përdoruesi del nga aplikacioni, por të gjitha mesazhet, grupet, cilësimet dhe të dhënat e tjera ruhen. Kur përdoruesi vendos të kthehet, mjafton të kyçet sërish me numrin e tij të telefonit dhe gjithçka do të jetë ashtu siç e ka lënë.
Ky zhvillim i ri është veçanërisht i dobishëm për ata që duan të marrin një pushim të shkurtër nga komunikimi digjital, pa rrezikuar humbjen e të dhënave apo ndërprerjen e bisedave të rëndësishme.
Aktualisht, opsioni mban etiketën “internal”, që nënkupton se është në fazën e testimit të brendshëm. Nëse gjithçka shkon sipas planit, hapi i radhës do të jetë lançimi i funksionit për përdoruesit beta, përpara se të bëhet pjesë e versionit zyrtar dhe stabil të aplikacionit.
Me këtë ndryshim, WhatsApp synon të rrisë fleksibilitetin dhe kontrollin e përdoruesve mbi praninë e tyre në platformë, duke i përshtatur nevojave gjithnjë e më dinamike të komunikimit modern. /Katror.info
Përgatiti:
