Për herë të parë Kosova është nikoqire e Olimpiadës Europiane të Matematikës për Vajza ‘EGMO 2025’, në të cilën po marrin pjesë garuese nga 55 vende të botës.
Secili shtet ka ekipin e vet garues.
Gjithsej 219 vajza po garojnë në këtë Olimpiadë.
Mundesh me e lexu edhe…
Olimpiada ‘EGMO 2025’ është organizuar nga Shoqata e Matematikanëve të Kosovës, ndërsa është mbështetur me 200,000 euro nga Qeveria e Kosovës.
Valmir Krasniqi nga Shoqata e Matematikanëve të Kosovës në një intervistë për KALLXO.com ka thënë se dy vjet më parë kanë aplikuar që Olimpiada të organizohet në Kosovë më 2025, e cila do të zgjasë deri më 17 prill.
Sipas Krasniqit, Olimpiada mbahet vetëm për vajza në mënyrë që ato të nxiten më shumë për të studiuar matematikë apo shkencë ku zbatohet matematika.
Ai ka treguar se përmes Olimpiadës së Matematikës kanë arritur që t’i sjellin disa kompani gjigante në Kosovë, të cilat mund të rekrujtojnë ndonjë prej garueseve në kompanitë e tyre.
“Qëllimi ynë ka qenë që këtë EGMO ta organizojmë në aspektin profesional dhe organizativ në mënyrë që këto të reja po edhe shoqëruesit e tyre ta ndryshojnë përceptimin se Kosova s’mundet edhe s’ka kapacitete me qenë një organizatore e një eventi me përmasa të tilla dhe ne mendojmë që ia kemi arritur në një masë jashtëzakonisht të mirë” – ka deklaruar Krasniqi.
Kurse, për organizimin e Olimpiadës, Krasniqi tha se kanë hasur në disa vështirësi si akomodimi i garueseve dhe shoqëruesve të tyre, e që gjithsej janë rreth 500 persona.
Gjithashtu për organizimin e Olimpiadës kanë angazhuar edhe një numër të vullnetarëve.
“Kosova nuk ka kapacitete që me një ose dy hotele t’i akomodojë 500 vetë. Pastaj, kemi pasur shumë problem me një sallë të përmasave që i plotëson kushtet për ceremoni, ku këta 500 vetë akomodohen. Pastaj, salla e testimit, kemi shiku të gjitha mundësitë në institucionet publike që ta realizojmë edhe për shkak të kostos, sepse me qëndru 6-7 ditë në një sallë siç është ‘Klan Arena’ është një kosto jashtëzakonisht e madhe” – ka thënë Krasniqi.
Ekipi i Kosovës që garon në Olimpiadën ‘EGMO 2025’ përbëhet nga katër vajza, një nxënëse e klasës së shtatë dhe tri nxënëse të klasës së 11-të.
Ndërsa, për rezultatet e ekipit të Kosovës viteve tjera në këtë Olimpiadë, Krasniqi thot se nuk janë të kënaqur në krahasim me ekipet e tjera.
“Kemi fitu një medalje të argjendtë në vitin 2022 dhe kemi fitu një medalje të bronztë në 2021, mirëpo në tri vitet e fundit nuk kemi fitu medalje edhe për shkak që vajzat nuk janë shumë të interesuara të merren me matematikë… Ne shpresojmë që vajzat tash e tutje do të nxiten më shumë për të marrë pjesë në EGMO” – ka theksuar Krasniqi.
Pjesëmarrëset në ‘EGMO 2025’ janë testuar në dy ditë me nga tri probleme nga matematika.
Për Kateryna Sydorenko nga Ukraina, kjo është hera e dytë që merr pjesë në Olimpiadën e Matematikës. Ajo ushtron 4-5 orë matematikë në ditë.
Sydorenko mendon se provimi i Olimpiadës këtë vit ishte më i vështirë se ai herën e kaluar.
“Më shumë në matematikë më pëlqen ndjenja kur zgjidh një problem që mendon se ishte shumë i vështirë dhe nuk mund ta zgjidhje, sepse është kënaqësia dhe lumturia që përjeton për të qenë në gjendje të arrish çfarë do. E dua matematikën në përgjithësi për kompleksitetin e saj, por në të njëjtën kohë, aftësinë tënde për të parë problemin që je duke zgjidhur” – ka thënë Sydorenko.
“Nuk kam qenë në Kosovë, kjo është hera ime e parë. Ne vetëm sa kemi ardhur dhe nuk kishim kohë për ta hulumtuar shumë, por deri më tani ka qenë mirë dhe jam kënaqur duke parë gjithçka në Prishtinë” – ka shtuar Sydorenko.
Kyla (Qiaojia) Chen, nxënëse nga Zelanda e Re, ka ardhur për herë të parë në Europë.
“Nuk do t’i thosha i lehtë një provimi të Olimpiadës së Matematikës. Dita e parë [e testimit] ishte mirë mendoj, sepse kishte teori të numrave dhe mua më pëlqen teoria e numrave” – tha Chen.
“Jo vetëm vajzat, por mendoj që të gjithë duhet të studiojnë më shumë matematikë. Sepse, e dini, të gjithë mendojnë se, argumenti i zakonshëm është – kur do ta përdorësh këtë në jetë, por është matematika, matematika nuk ka të bëjë vetëm rreth aftësive, ka të bëjë me mënyrën se si të mëson të mendosh logjikisht në zgjidhjen e problemeve dhe mendoj se kjo është e transferueshme në të gjitha aspektet e jetës” – ka shtuar ajo.
Krasniqi ka thënë se kanë pasur disa raste kur u kanë kërkuar pjesëmarrëseve që t’i respektojnë rregullat e Olimpiadës.
“Ka pasur vajza të cilat nuk i kanë respektuar disa rregulla që janë të parapara me i respektu dhe ne në mënyrë krejtësisht normale i kemi njoftuar që këto rregulla duhet të zbatohen… Këto janë talentet, janë nxënëset më të mira në shtetet e tyre dhe nuk besoj që këto vijnë për me kopju” – tha Krasniqi.
EGMO 2025 do të mbahet deri më 17.04.2025, kurse këto ditë pjesëmarrëset do të kenë mundësi ta vizitojnë Kosovën./Kallxo.com
Përgatiti:
