Portieri Diogo Costa është hero i Portugalisë. Ai ka pritur tri penallti të Sllovenisë për ta dërguar Portugalinë në çerekfinale të Euro 2024. Ishin sllovenët që gjuajtën të parët nga pika e bardhë. Goditjen e Josip Iliçiqit e ndali Costa.
Më pas Cristiano Ronaldo ishte i saktë për 1:0. Costa ndali edhe goditjen e Jure Balkovecit. Dhe Bruno Fernandes shënoi për 2:0. Portieri i jashtëzakonshëm portugez e priti edhe goditjen e Benjamin Verbiqit nga pika e bardhë. Dhe kështu Portugalia ishte në pozitë shumë të mirë.
Bernardo Silva mori përgjegjësinë dhe dërgoi topin në portë. Portugezët nisën festën e madhe.
Fituan 3:0 në penallti ndaj sllovenëve të pandalshëm. Ronaldo dhe bashkëlojtarët e tij kaluan nga dëshpërimi i thellë në gëzim të skajshëm. Superylli Ronaldo ishte në lot pasi Jan Oblak priti gjuajtjen e tij nga pika e bardhë në minutën e 105-të. Ai u ngushëllua nga të gjithë bashkëlojtarët.
Sllovenët kishin rast të artë pak para fundit të vazhdimit të dytë. Benjamin Sheshko u nis në kundërsulm dhe doli përballë Costas në minutën e 115-të. Por portieri portugez zgjati këmbën për të ndalur goditjen e Sheshkos dhe për të siguruar më pas kualifikimin e jashtëzakonshëm.
90 minutat e kohës së rregullt janë dominuar nga Portugalia, por edhe sllovenët kishin rastet e tyre. Gola nuk u shënuan. Nuk u shënuan as në dy vazhdimet nga 15 minuta. Dhe më pas Costa doli në skenë me pritje vendimtare për të bërë vend për vete dhe bashkëlojtarët në çerekfinale të Evropianit.
Portugalia e mundi Slloveninë, duke bërë kështu që ajo të shkojë në çerekfinalen e Euro 2024, për t’u ndeshur me Francën.