Posta e Kosovës ka marrë një rol të ri publik, duke nisur zyrtarisht shpërndarjen e gjobave digjitale të trafikut në bashkëpunim me Policinë e Kosovës dhe 14 komuna që tashmë kanë nënshkruar marrëveshje për këtë shërbim, shkruan Katror.info.
Lajmi është bërë i ditur nga ministrja në detyrë e Ekonomisë, Artane Rizvanolli, përmes një postimi në rrjete sociale, ku theksoi rëndësinë e këtij hapi si një lehtësim konkret për qytetarët dhe një kontribut për rritjen e sigurisë në komunikacion.
“Posta e Kosovës ka marrë përsipër një funksion të ri publik, që zgjeron shërbimet postare dhe ndihmon në shpërndarjen më të shpejtë dhe efikase të gjobave digjitale”, shkroi Rizvanolli. “Ky bashkëpunim me Policinë dhe komunat është një hap drejt modernizimit të shërbimeve publike”.
Mundesh me e lexu edhe...
Ministrja theksoi se ky proces do të zgjerohet gradualisht në të gjithë territorin e Kosovës dhe u bëri thirrje kryetarëve të komunave që ende nuk janë pjesë e këtij bashkëpunimi, të bashkohen për të përforcuar shërbimet publike dhe për të ofruar zgjidhje më të shpejta për qytetarët.
Posta e Kosovës po e ndërmerr këtë hap në një vit të veçantë për ndërmarrjen, pasi për herë të parë pas më shumë se një dekade operimi me humbje kumulative prej 10 milionë euro, e ka mbyllur vitin me fitim prej mbi 250 mijë euro. Rizvanolli e cilësoi këtë si dëshmi se edhe ndërmarrjet publike mund të jenë efikase, moderne dhe në shërbim të qytetarëve në çdo pjesë të vendit.
“Posta është një shembull se si mund të ndërtojmë institucione funksionale që i shërbejnë qytetarëve çdo ditë”, përfundoi Rizvanolli.
Shpërndarja e gjobave digjitale përmes Postës pritet të përshpejtojë komunikimin zyrtar me qytetarët dhe të rrisë transparencën e procesit, ndërsa njëkohësisht përforcon partneritetin ndërinstitucional në funksion të sigurisë rrugore./Katror.info
