Mbi 20 filma premierë kosovarë dhe botërorë, kineastë të njohur, producentë të filmave ikonikë të shpërblyer me çmime Oscar e Bafta, evente të ndryshme dhe muzikë sjell PriFest në edicionin e 15-të, që nisi të martën në mbrëmje.
Në mesin e adhuruesve të filmit drejtori i Festivalit Ndërkombëtar të Filmit Pri-Fest, Fatos Berisha dhe drejtoresha e Qendrës Kinematografike të Kosovës, Blerta Zeqiri hapën festivalin duke shpresuar që kryeqyteti jo vetëm që do të frymojë me festën e filmit, por edhe do të japë mundësinë e krijimit të lidhjeve me kineastët e huaj për bashkëprodhimin e filmave në të ardhmen.
Në një intervistë për Katror Media, Fatos Berisha thotë se e veçanta e këtij festivali është kategoria “Shteti në Fokus” që këtë vit është përzgjedhur të jetë Izraeli. Tjetër gjë që e bën të veçantë këtë festival janë emrat e njohur të producentëve të filmave që kanë lënë gjurmë ne historinë e filmit, siç është producenti i Monthy Pyton ‘s Holy Grail, Mark Forstater, producenti i filmit King’ Speech, Mark Foligno etj.
Mundesh me e lexu edhe…
“Disa që janë më specialë është Mark Forstater, që e kemi në jurinë kryesore, që është producenti i njohur i filmit ikonik Monthy Python and the Holy Grail, mark Forstater, kemi producentin ekzekutiv të King’s Speech, Mark Foligno që ka 3-4 çmime Oscar e Bafta. Prezenca e emrave kineastëve e bën një festival – festival, por natyrisht edhe ofrimi i filmave. Megjithatë, është më lehtë me i sjell filmat sesa kineastët,” thotë Berisha duke shtuar se PriFest ka pasur nderin që të sjellë përgjatë viteve emra të shquar të kinematografisë duke e shndërruar atë në një festival prestigjioz.
“Ne që nga viti i parë kemi arritur ta sjellim një person me emër shumë të madh- Vanesa Radgrave, ajo tashmë edhe është bërë kryetare nderi e bordit tonë edhe emri i saj që në vitin e parë ia ka rrit autoritetin Festivalit edhe na e ka bërë më të lehtë punën. Kjo shkon kështu nëse e thërret dikend të nivelit të lartë dhe i thua se viteve të kaluara te ne kanë qenë këta (emra të shquar) ata krijojnë një farë sigurie që ky është një festival serioz dhe nëse ata kalojnë mirë këtu e shpërndajnë fjalën,” tha ai.
Këtë vit PriFest ka marrë mbështetje nga Qendra Kinematografike e Kosovës. Drejtoresha e QKK-së, Blerta Zeqiri thotë për Katror Media se kanë vendosur të mbështesin festivalet vendore të filmave, duke synuar që në të ardhmen ta bëjnë industrinë e filmit – industri kryesore të Kosovës.
“Mendoj se jemi rrugës së duhur dhe të drejtë dhe duhet vazhduar këtë valë të progresit që e kemi filluar. Kështu që besoj se duhet të vazhdoje mbështetja institucionale, që është shumë e rëndësishme,” tha Zeqiri, duke theksuar se sivjet QKK do të ndajë një shpërblim të “Best Pitch” për projektin kosovar më të mirë filmik.
Nata e parë e festivalit u hap me filmin kosovaro-zviceran “Toka brenda meje” nga regjisori Fisnik Maxville, ndërsa Berisha thotë se kinematografia kosovare është duke parë një lulëzim në 10 vjetët e fundit.
“Kjo flet për një rritje brenda këtij 10 vjeçarit dhe tash jemi në fazën kur jemi në trend. Kur vjen një film nga Kosova automatikisht zgjon kërshëri te selektorët e festivaleve ndërkombëtare. Ka qenë shumë vështirë më mbërri deri këtu. Unë vetë kam qenë drejtor i QKK-së dhe e di sa ka qenë problem me lobu, me i bind me i kqyr filmat ma së pari. Tash e kemi një betejë tjetër të mbetjes në këtë nivel që të mos biem poshtë dhe që nevojitet një angazhim i madh i gjithë industrisë – QKK-së, kompanive, komunitetit tonë – ky është mozaik ku secili e jep kontributin e vet,” tha Berisha për Katror Media.
Suksesit të filmave kosovarë i gëzohet shumë regjisorja Blerta Zeqiri, që është vetë fituese e shumë çmimeve ndërkombëtare.
“Mundem me thonë se zemra mal po më bëhet kur po e shoh se sa shumë rëndësi ka tani arti i Kosovës në botë, por edhe në Kosovë. Në të kaluarën kur më ka ra me marrë pjesë në festivale me filmat e mi në njëfarë forme kam qenë e vetmuar, që vec unë kam qenë shqiptare dhe gjithë të tjerët kanë qenë të huaj. S’ka pase shanse me dëgju dikënd të flasë shqip Tash nëpër festivale jemi shumë, shkojmë me 2-3 projekte, degjon që flet shqip. Është një zhvillim shumë i bukur i kulturës dhe artit që ka ndodhë dhe shpresoj të vazhdoj,” tha ajo.
Sot në oren 13:00 ne Barabar Center (Grand Hotel, kati 4) mbahet Panel Diskutimi me temën ‘Prezentimi i marreveshjes se bashkeprodhimit Izrael-Kosove’.
Panelistë janë: z.Hajrullla Çeku, Minister i Kultures, Ambasadorja e Izraelit ne Kosove znj. Tammar Ziv, Zv.Ministra e Jashtme znj.Liza Gashi, drejtoresha e QKK znj.Blerta Zeqiri dhe producenti izraelit Kobi Mizrahi, moderator Fatos Berisha, PriFest./Katror.info
Përgatiti:
