Më 22 shtator 2024, kryeqyteti i Kosovës, Prishtina, mirëpriti edicionin e 23-të të Maratonës dhe Gjysmë Maratonës në Prishtinë, një event i organizuar nga Federata Atletike e Kosovës që mirëpriti mbi 1 mijë pjesëmarrës.
Kjo ngjarje madhështore sportive u karakterizua nga gara të ndryshme, duke përfshirë maratonën e plotë 42 km, si dhe disiplina të tjera si 2 km, 5 km, 10 km dhe 21 km.
Në maratonën e femrave, triumfoi kampionia e Evropës në 3000 metra me pengesa, shqiptarja Luiza Gega, duke lënë pas konkurrencën me një performancë të shkëlqyer.
Ndërsa, në kategorinë e meshkujve, keniani Shedrack Kimaiyo doli fitues, duke i dhënë garës një dimension ndërkombëtar.
Pjesëmarrja nga maratonistët kosovarë ishte gjithashtu e fuqishme. Olimpistja Gresa Bakraçi zuri vendin e parë në garën 10 km, duke dëshmuar cilësinë dhe përkushtimin e sportistëve tanë. Në garën e 5 kilometrave, Genc Isufi mori vendin e parë për meshkuj, ndërsa Valentina Kelmendi dhe Merve Spahi siguruan vendet e dyta dhe të treta për femrat.
Gara u mbështet nga një numër i madh sponsorësh, të cilët kontribuan në realizimin e suksesshëm të këtij eventi të rëndësishëm sportiv. Organizatorët falënderojnë të gjithë pjesëmarrësit dhe sponsorët për mbështetjen e tyre të palëkundur, duke u shprehur entuziazmin për edicionet e ardhshme.
Komiteti Olimpik i Kosovës gjithashtu përgëzoi Federatën Atletike të Kosovës për organizimin e këtij eventi madhështor, i cili jo vetëm që promovon sportin, por gjithashtu fuqizon dhe bashkon komunitetin sportiv vendas dhe ndërkombëtar./Katror.info
Përgatiti:
