Rritja e çmimit të energjisë elektrike prej 16 për qind ka ndikuar në fillimin e rritjes së çmimeve të produkteve ushqimore.
Përveç rritjes së çmimit të bukës në disa vende, po paralajmërohet të ketë rritje edhe në produktet esenciale.
Por nga ky vendim i ZRRE-së, siç duket më së shumti janë afektuar bizneset në Prishtinë, e pikërisht në produktin më të preferuar të qytetarëve, në kafe.
Mundesh me e lexu edhe…
Çmimi i kafes në Prishtinë që nga fillimi i majit në disa kafene është rritur menjëherë, duke arritur deri në 2 euro.
Përderisa, në qytete të tjera të Kosovës, ka biznese të gatsronomisë që nuk janë ngutur ka shumë për të rritur çmimet.
Në Gjilan një kafe mund ta pishë për 70 centë. Në Ferizaj, edhe me 1.20 centë.
Në Lipjan një kafe kushton 1 euro.
Ndërsa në Mitrovicë kafja kushton prej 70 centë e deri në 1.20 euro. Përderisa në veri një kafe mund të pihet edhe me 50 centë.
Petrit Kllokoqi nga Shoqata e Gastronomëve thotë se gastronomët nuk janë ata që i shtrenjtojnë produktet, por gastronimisë i shtrenjtohen produktet.
“Krejt produktet janë shtrenjtuar. Nuk është që ne si gastronom kemi shtrenjtuar produktet. Çmimet janë shtrenjtuar të gjitha produktet. Neve na janë shtrenjtuar rreth 30 për qind çmimi i blerjes së kafes në këtë rast por njëkohësisht shporta e konsumatorit është shtrenjtuar deri në 37 për qind e që i bie që ne furnizimet na janë rritë për rreth 37 për qind. Kemi dyfishim të rrogës së stafit, kemi rritje të çmimit të energjisë elektrike e gjithçka tjetër që kanë çuar gastronomët deri te kjo. Të kemi të qartë se gastronomët nuk i rrisin çmimet e produkteve. Gastronomisë i shtrenjtohen produktet”, ka thënë ai.
Sipas tij, nuk është marrë ndonjë vendim i përbashkët për rritjen e çmimit të kafes, por çmimet i kanë rritur individualisht disa lokale.
“Nuk është që është diskuar në grup të gastronomeve kjo. Kjo është një vendim që i kanë shtrenjtuar vetvetiu disa kafene. Në disa lokale është shtrenjtuar por është bërë më e madhe rritja e kafes se normalisht janë shtrenjtuar të gjitha produktet”, ka deklaruar Kllokoqi.
E rritja e produkteve ushqimore por edhe e kafesë, ka ndikuar direkt në xhepin e qytetarëve.
Kjo ndihet më së shumti te pensionistët, të cilët thonë se janë mësuar të takohen më shpesh me shoqërinë nëpër kafene për ta kaluar kohën, ndërsa tani duhet t’i rrallojnë ato.
Shtrenjtimi i rrymës u kundërshtua me protesta të organizuara nga grupi “Asnjë Cent Më Shumë” të cilët paralajmëruan se më këtë rritje do të bëhet edhe shtrenjtimi i produkteve esenciale të ushqimit./Koha
Përgatiti:
