Është përmbyllur me sukses punëtoria përfundimtare për Projektligjin për Mbrojtjen e të Dhënave Personale nga Institucionet e Zbatimit të Ligjit, e zhvilluar me mbështetjen e CYBERKOP, në kuadër të Projektit “Octopus”, dhe në bashkëpunim me Agjencinë për Informim dhe Privatësi.
Ky projektligj shënon një hap të madh drejt përafrimit të Kosovës me Direktivën e BE-së për Zbatimin e Ligjit (LED), duke u bazuar gjithashtu në standardet ndërkombëtare, përfshirë Konventën e Budapestit për Krimin Kibernetik. Përgatitja e tij është rezultat i një përpjekjeje njëvjeçare për të ndërtuar një kuadër ligjor modern dhe funksional që garanton mbrojtje më të avancuar të të dhënave personale, rritje të llogaridhënies nga institucionet e zbatimit të ligjit dhe bashkëpunim më efikas ndërkufitar në luftën kundër krimit kibernetik dhe në trajtimin e provave elektronike.
Me përfundimin e kësaj faze, hapi i radhës është harmonizimi i projektligjit me legjislacionin vendor dhe zyrtarizimi i tij përmes procedurave institucionale. Ky zhvillim pritet të forcojë më tej mbrojtjen e privatësisë në vend dhe të afrojë Kosovën me standardet e Bashkimit Evropian në fushën e drejtësisë dhe teknologjisë./Katror.info
