Ndërsa bota feston Krishtlindjet në muajin dhjetor, shumë australianë i gëzohen edhe një festimi të dytë – në mes të dimrit, në korrik. E njohur si “Krishtlindja në korrik”, kjo traditë është bërë tashmë një pjesë e dashur e kulturës festive në Australi, shkruan BBC.
Legjenda thotë se gjithçka filloi në vitin 1980 në një hotel malor në Katoomba, në rajonin e Blu Mountains, kur një grup irlandezësh kërkuan një Krishtlindje dimërore.
Garry Crockett, pronari i hotelit “Mountain Heritage”, vendosi t’u plotësonte dëshirën: vendosi zbukurime, përgatiti një darkë festive me mish të pjekur dhe puding tradicional, dhe mbrëmja u kthye në një festë të paharrueshme.
Mundesh me e lexu edhe…
Në qytete si Newcastle apo Melbourne, njerëzit organizojnë darka me shumë pjata, vendosin zbukurime festive dhe mbushin shtëpitë me atmosferë Krishtlindjeje.
“Do e festoja Krishtlindjen 10 herë në vit nëse do mundesha”, thotë Joshua Robb, 37 vjeç, një adhurues i Krishtlindjeve që përgatit darka speciale për miqtë e tij në korrik.
Në zonën historike The Rocks në Sidnei, rrugicat kalldrëmi kthehen në një “fshat dimëror” me stenda druri, drita të ngrohta, dëborë artificiale dhe erëra të shijshme të verës së zier, djathit të shkrirë dhe ushqimeve festive.
Organizatori i eventit, Vincent Hernandez, që është zhvendosur nga Parisi në Australi më shumë se një dekadë më parë, thotë se ai kërkonte të rikrijonte atmosferën e tregjeve të Krishtlindjeve nga Strasburgu.
Pronari i fermës që furnizon pemët e Krishtlindjes është Leo Damasi, i cili tregon se kërkesa për pemë në muajin korrik është rritur vazhdimisht në dy dekadat e fundit, duke shtuar të ardhura përtej sezonit tradicional të dhjetorit.
Madje edhe KFC – zinxhiri i famshëm i ushqimit të shpejtë është përfshirë në këtë valë festive duke promovuar oferta dhe menu speciale për “Krishtlindjen në korrik”.
Megjithatë, Garry Crockett, njeriu që nisi gjithçka, paralajmëron se disa njerëz po harrojnë thelbin e vërtetë të festës. Për disa, Krishtlindja në Korrik është më e këndshme sesa ajo në dhjetor.
“Shumë njerëz janë në prag të shpërthimit emocional në dhjetor, për shkak të gjithë stresit të akumuluar gjatë vitit”, shpjegon Garry./AP/Katror.info
