Pas suksesit të jashtëzakonshëm me filmat e shkurtër “Pa vend” (2021) dhe “Rrugës” (2024), të cilët u përzgjodhën në konkurrencën zyrtare të Festivalit të Filmit në Kanë – një arritje që e rendit Karahodën mes një rrethi shumë të ngushtë regjisorësh në nivel botëror – regjisori kosovar Samir Karahoda nis një kapitull të ri në karrierën e tij krijuese me projektin e parë të metrazhit të gjatë, Lost Frames, shkruan Katror.info.
“Jemi të lumtur të ndajmë lajmin se LOST FRAMES, projekti i parë i metrazhit të gjatë me regji nga Samir Karahoda, i përkrahur nga Qendra Kinematografike e Kosovës si projekt në zhvillim, është përzgjedhur për të marrë pjesë në Focus COPRO’ 2025, në kuadër të Marché du Film në Festivalin e Filmit të Kanës”, thuhet në njoftim e Qendrës Kinematografike të Kosovës.
Filmi, i cili është në fazën e zhvillimit dhe i përkrahur nga Qendra Kinematografike e Kosovës, është përzgjedhur për të marrë pjesë në edicionin e vitit 2025 të Focus COPRO’, program i zhvilluar në kuadër të Marché du Film në Festivalin e Filmit të Kanës.
Mundesh me e lexu edhe…
Focus COPRO’ është një ndër iniciativat më prestigjioze për zhvillimin e projekteve debutuese të metrazhit të gjatë nga regjisorët që kanë dëshmuar potencial të lartë artistik. Që nga viti 2018, programi ka shërbyer si trampolinë për regjisorët e rinj në skenën ndërkombëtare, duke ofruar mundësi për bashkëprodhime, partneritete kreative dhe ekspozim para profesionistëve të industrisë globale.
Përzgjedhja e LOST FRAMES në mesin e vetëm 7 projekteve ndërkombëtare që do të prezantohen sivjet në Focus COPRO’ vjen si një tjetër dëshmi e fuqisë së tregimit filmik të Karahodës, por edhe si një hap i rëndësishëm drejt realizimit të projektit të tij më ambicioz deri më tani.
“Besojmë se LOST FRAMES do të përfitojë ndjeshëm nga mundësitë që ofron Focus COPRO’, duke e bërë këtë përfshirje një pikënisje të rëndësishme për hapat e ardhshëm të filmit,” thuhet në njoftimin zyrtar nga Qendra Kinematografike e Kosovës.
Ky zhvillim vjen në një periudhë kur kinematografia kosovare po shënon praninë e saj me ndikim në ngjarjet më të rëndësishme ndërkombëtare, duke e konsoliduar vendin si një pikë të re referimi për talentin dhe narrativat autentike në artin e shtatë. /Katror.info
Përgatiti:
