Samsung ka publikuar Galaxy XR, kufjet e para të realitetit të përzier (mixed reality), që hyn drejtpërdrejt në garë me Apple Vision Pro.
Pajisja është tashmë në shitje me çmim 1,799 dollarë, shumë më lirë se rivali i saj nga Apple.
Në pamje, Galaxy XR ngjan dukshëm me Vision Pro. Dallimi kryesor është tek materialet: Samsung ka zgjedhur plastikë më të lehtë, duke e bërë pajisjen më të përshtatshme gjatë përdorimit.
Mundesh me e lexu edhe...
Ndryshe nga Vision Pro, Galaxy XR lejon pak dritë të depërtojë, duke mos e izoluar plotësisht përdoruesin nga ambienti përreth.
Kufja ka dy ekrane micro-OLED me cilësi të mirë, por teksti nuk është aq i mprehtë sa në pajisjen e Apple.
Ajo funksionon me sistemin e ri Android XR, të zhvilluar në bashkëpunim me Google, dhe përfshin integrimin e Gemini.
Me ndihmën e kamerave, Gemini mund të analizojë se ku po sheh përdoruesi dhe të japë përgjigje për objektet në pamje.
Galaxy XR shitet për 1,799.99 dollarë, me mundësi pagesash për 24 muaj, dhe blerësit e parë përfitojnë falas “Explorer Pack”, me vlerë mbi 1,140 dollarë.
Paketa përfshin 12 muaj qasje në Google AI Pro, YouTube Premium, Google Play Pass, Adobe Project Pulsar, Calm Premium dhe abonim në NBA League Pass.
Samsung ofron gjithashtu Galaxy XR Travel Case dhe Galaxy XR Controller, secili me çmim 250 dollarë.
Ky publikim shënon hyrjen e fuqishme të Samsung në garën për realitetin e përzier – një betejë që po e përcakton të ardhmen e teknologjisë.
