Studiuesit në Institutin Kërkimor biomjekësor Scripps, në Shtetet e Bashkuara kanë zhvilluar një antitrup që është në gjendje të bllokojë efektet e toksinave vdekjeprurëse të pranishme në helmet e një shumëllojshmërie të gjerë gjarpërinjsh, duke përfshirë mamban efamshme të zezë, që konsiderohet si zvarraniku më i rrezikshëm në botë dhe kobran, gjarpri helmues më i gjatë në botë.
I testuar te minjtë, antidoti i mbrojti ata jo vetëm nga vdekja, por edhe nga paraliza, siç raportohet në studimin e publikuar në revistën “Science Translational Medicine”. Megjithatë, antitrupi nuk funksionon kundër helmit të nepërkës. Për të zhvilluar një antidot universal, do të nevojitet një koktej i përbërë nga antitrupa të ndryshëm.
Studiuesit u frymëzuan nga studimet e tyre të mëparshme të kryera mbi vaksinat kundër virusit HIV. Ata kuptuan se, si HIV, toksinat e gjarpërinjve kanë gjithashtu rajone të ruajtura që nuk mund të ndryshojnë nga një specie në tjetrën, dhe që për këtë arsye përbëjnë objektiva ideale për një antitrup të synuar, përcjell A2Cnn.
Duke krahasuar proteinat që përmbahen në helmet e një shumëllojshmërie të gjerë gjarpërinjsh, autorët e studimit identifikuan njërin të quajtur “toksina me tre gishta” ose 3FTx, e cila përmban pjesë shumë të ngjashme midis specieve të ndryshme. Pasi gjetën një kandidat të mirë, studiuesit vazhduan të gjurmojnë për antitrupa njerëzorë të aftë për t’u lidhur me të midis 50 miliardë mundësive.
Duke ngushtuar kërkimin në rreth 3,800 molekula, ata gjetën 30 që njohin më shumë se një version të 3FTx dhe, midis tyre, një në veçanti, i quajtur 95Mat5, dallohet për aftësinë e tij për t’u lidhur shumë mirë me të gjithë ata që janë testuar. Prandaj, rezultati përbën një hap shumë të rëndësishëm përpara drejt një antidoti universal.
Më shumë se 100,000 njerëz në vit, kryesisht në Azi dhe Afrikë, vdesin nga pickimi i gjarpërinjve, dhe antidotat e disponueshme aktualisht funksionojnë vetëm për një specie të vetme. /Katror.info
Përgatiti:
