Mushkonjat duhet të trajtohen me medikamente kundër malaries për të eleminuar infeksionin dhe për të mos përhapur më tej sëmundjen, thonë kërkues nga SHBA.
Parazitët e malaries, që vrasin pothuajse 600,000 njerëz në vit, kryesisht fëmijë, përhapen nga mushkonjat femra kur pinë gjak. Përpjekjet aktuale janë për të vrarë mushkonjat me insekticide dhe jo për t’i kuruar nga malaria.
Por një ekip në Universitetin Harvard ka gjetur dy medikamente që mund t’i pastrojnë me sukses mushkonjat nga malaria kur ato i thithin nëpërmjet këmbëve. Synimi afatgjatë është të mbulohen rrjetat e krevatit me këtë kombinim medikamentesh, shkruan BBC, përcjell Katror.info.
Mundesh me e lexu edhe…
Fjetja nën rrjetë krevati ka qenë një nga mënyrat më të suksesshme për parandalimin e malaries, pasi mushkonjat që përhapin sëmundjen zakonisht gjuajnë natën.
Rekomandohen edhe vaksina për fëmijët që jetojnë në zona me rrezik të lartë të malaries. Rrjetat janë një barrierë fizike dhe përmbajnë insekticide që vrasin mushkonjat që ulen mbi to.
Por mushkonjat kanë zhvilluar rezistencë ndaj insekticideve në shumë vende, kështu që kimikatet nuk i vrasin më si më parë.
“Ne nuk kemi provuar më parë të vrasim drejtpërdrejt parazitët në mushkonjë, sepse deri tani synimi ishte të vritej vetë mushkonja,” thotë studiuesja Dr. Alexandra Probst nga Harvard.
Megjithatë, ajo thotë se kjo qasje “nuk po funksionon më”.
Veprim urgjent për shkak të rezistencës ndaj ilaçeve kryesore
Kërkuesit analizuan ADN-në e malaries për të gjetur dobësi të mundshme gjatë infektimit të mushkonjave.
Ata testuan një shumëllojshmëri medikamentesh dhe përzgjodhën një listë me 22 të tilla, të cilat u testuan kur mushkonjat femra morën një gjak të kontaminuar me malaria.
Në artikullin e tyre në revistën Nature, shkencëtarët përshkruajnë dy medikamente shumë efektive që vranë 100% të parazitëve.
Medikamentet u testuan në materiale të ngjashme me rrjetat e krevatit.
“Edhe nëse mushkonja mbijeton kontaktin me rrjetën, parazitët brenda saj vriten dhe ajo nuk përhap më malarinë,” tha Dr. Probst. “Besoj se kjo është një qasje shumë premtuese, sepse është një mënyrë krejtësisht e re për të synuar mushkonjat.”
Ajo thotë se paraziti i malaries ka më pak gjasa të zhvillojë rezistencë ndaj medikamenteve, pasi ka miliarda prej tyre në çdo person të infektuar, ndërsa në çdo mushkonjë janë më pak se pesë.
Efekti i medikamenteve zgjat për një vit në rrjetat, duke e bërë atë një alternativë të lirë dhe afatgjatë ndaj insekticideve, thonë studiuesit.
Kjo qasje është provuar në laborator. Hapi tjetër është testimi në Etiopi për të parë nëse rrjetat me medikamente anti-malaria janë efektive në botën reale.
Do të duhen të paktën gjashtë vjet për të përfunduar studimet dhe për të ditur nëse kjo metodë funksionon.
Por synimi është që rrjetat e krevateve të trajtohen si me medikamente anti-malarie ashtu edhe me insekticide, në mënyrë që nëse njëra metodë dështon, tjetra të funksionojë./Katror.info
